CEBU, Philippines - Upat ka koponan ang nagpabiling walay pilde sud sa tulo ka duwa sa 4th Fellowship of Christian Athletes (FCA) Basketball League didto sa karaang gym sa Sacred Heart School-Ateneo de Cebu (SHS-AdC) sa General Maxilom Avenue, ning siyudad.
Ang CFGA Kingdom Builders, CCF, Faith Tabernacle Eagles ug Living Word-International Bible Institute (LW-IBI) parehong nagbitbit og 3-0 nga baraha ning ikatulong semana sa liga.
Ang CFGA ni coach Abet Bungcaras naghangad sa balanseng ataki aron maka-eskapo bitbit ang 79-76 nga kadaugan batok sa Mt. Olives Spartans, ang CCF ni Albert Alocillo yano kaayong milubong sa Cross Pointe All-Stars sa iskor nga 63-41, samtang si Axel Rabaya mikubit og 22 puntos alang sa Faith Eagles nga mibihag sa Living Word-Talisay sa 34-under division actions.
Upat ka players ang miiskor og double figures alang sa CFGA sa pagpangulo ni Juan Camosa nga mitusik og 16 puntos, gisundan ni Adelfo Delgado nga mikabkab og 15 puntos. Sila si Ernesto Limitares ug Tito Maga nagkumboya'g 21 puntos alang sa CFGA.
Sa 35-above division, ang LW-IBI ni Pastor Mel Caparros milansang sab og 3-0 nga baraha human sa ilang kadaugan batok sa MCOF Basketbolista, 84-70.
Gipangulohan ni Edwin Catamco ang LW-IBI pinaagi sa iyang 19 puntos, samtang sila si Guillaume Gauvain, Al Solis ug Mario Suarez mitimbre'g 10 puntos matag usa alang sa LW-IBI.
Sa lain pang mga duwa, ang BCHF mipilde sa NISSI, 56-50, ang PC Nets nakaipsot sa LW-ACES, 55-53, samtang ang Christian Workers Basketball Association (CWBA) mipukan sa LW-South sa iskor nga 85-72.
Midaog sab ang House of Hope (HOH) Singers batok sa R12 Coaches, 76-67 ubos sa pagpangulo ni Mark Qua ug Jonix Genson nga nagkumboya'g 36 puntos. Nakakuha sab sila'g suporta gikan nilang Nelson Aguilar ug Gino Amodia nga adunay 14 puntos matag usa.