CEBU, Philippines - Naghangad ang Southwestern University (SWU) Cobras sa ilang salida ni Mark Jayven Tallo sa second period, ingon man sa kainit sa mga kamot nilang Adam Mohammed ug Landry Sanjo sa final half aron tumbahon ang University of San Jose-Recoletos (USJ-R) Jaguars, 68-47 aron tukbon ang korona sa Cebu City Mayor's Sinulog Cup Inter-Collegiate Basketball Tournament sa miaging gabii didto sa Cebu Coliseum.
Si Tallo mibugwak og 14 sa iyang game-high 22 puntos nga nakapaluya sa Jaguars, samtang sila si Mohammed ug Sanjo miabuno'g 15 ug 11 puntos matag usa dihang ang Cobras miharos sa upat ka duwa aron bitbiton ang championship trophy ug P50,000 nga ganting salapi.
Ang ngilngig nga duwa ni Tallo maoy nakapahimo kaniyang Finals MVP ug otomatik nga nakakuha'g luna sa Mythical Five uban nilang Sanjo, Daryl Goloran, Monbert Arong ug James Regalado sa USJ-R.
Nakatabla ang Jaguars, 21-all, apan si Tallo nga daku'g pagsalig sa iyang kaugalingon, miduslit og 8-0 run aron sakmiton pagbalik ang labaw, 28-21.
Katapusang nakapakita og maayong duwa ang Jaguars sa iskor nga 29-33 dihang sila si Mohammed ug Sanjo nagkumboya'g 11-0 run nga naghatag sa Cobras og komportabling labaw.