CEBU, Philippines - Ang masaarong seklista nga si Ana Patricia 'Ica' Maximo mikabkab og duha ka bulawang medalya alang sa Team Cebu City dihang gidominar niya ang Batang Pinoy Cycling National Finals kagahapon didto sa Bacolod City sa Negros Occidental.
Si Maximo, 14-anyos, sa YKKBikes.com, naghari sa girls' division sa road cycling event sa Batang Pinoy sa oras nga 46:03.04.
Gipilde niya si Maia Yusay nga mioras og 48:08.79 ug Mikaela Paulina sa oras nga 50:18.20 nga pulos gikan sa dakbayan sa Bacolod.
Ang grade-8 student sa Sacred Heart School-Hijas de Jesus kanunay naa sa luyo ug mibulhot kini gikan sa field human sa singko kilometros gikan sa pagsugod.
Sa sayong bahin sa lumba, ang 2013 Philippine National Games (PNG) Track Cycling double medalist nga si Maximo nakasugat og problema dihang ang kadina sa iyang biseklita naligas ug natagak sa dalan, apan nakarekober ra sab hinuon.
Sa laing bahin, ang mga pambato sa Pangasinan nga sila si Emmanuel delos Santos (1:15:59:64), Canlas Malone Jr. (1:15:59:65) ug Evans Scott (1:15:59:67) maoy top three finishers sa boy’s cycling race. (BANAT PALARO)