CEBU, Philippines - Giusban sa University of the Visayas (UV) Green Lancers pagpukan ang University of San Carlos (USC) Warriors, 71-59 aron sakmiton ang third placetrophy sa Cebu City Mayor's Sinulog Cup 2014 Inter-Collegiate Basketball Tournament kagabii didto sa Cebu Coliseum.
Ning pagsuwat, padayon pang nagduwa ang inilog nga Southwestern University (SWU) Cobras batok sa rookie-laden nga University of San Jose- Recoletos (USJR) Jaguars alang sa "knockout" finals.
Sa miaging adlaw, gilubong sa Lancers ang Warriors, 84-66 diin ilang gitapos ang third quarter sa 65-33 nga abante.
Kagahapon, nagpakita og katakus ang Warriors sa fourth quarter ug nangigo sila sa mga tirada gikan sa gawas aron mahaw-as sa dakung lungag ug mihiyos ang losing margin.
Pirmeng naglabaw ang Lancers, apan nakatabla ang Warrriors didto sa third period, 49-all human sa three-pointer ni Anthony Guy Romaguera.
Wala hinuon masakmit sa Warriors ang labaw tungod kay gitubag kini sa bag-ong import sa Lancers nga si Jean Mpoma sa
iyang three-point play aron moabante pag-usab, 52-49 ug sukad niadto wala na sila molingi pa hangtod nahurot ang oras sa duwa.
Ang Lancers, kinsa nakadawat og P15,000 nga ganting salapi ug tropeyo gipangulohan ni Joseph Senumpan sa iyang 14 puntos, samtang si Wowie Escocio miamot og 10 puntos.
Bugtong si Ian Ortega lang maoy nakahimo'g double figures sa Warriors pinaagi sa iyang 22 puntos. (BANAT PALARO)