CEBU, Philippines - Hingpit nang mimartsa ngadto sa Final Four ang topseed Barangay Ginebra San Miguel human nila gidispatsar ang Alaska Aces sa iskor nga 108-95 sa ilang "do-or-die" quarterfinals game sa PBA Philippine Cup kagahapon didto sa Cuneta Astrodome.
Ang Ginebra magpaabot na lang sa modaog sa duwa tali sa Talk N' Text Tropang Texters ug San Mig Coffee Mixers nga maoy sunod nilang sangkaon alang sa "best-of-five" semifinals series.
Ang Talk ‘N Text ug San Mig magtiwas karong alas-5 sa hapon didto gihapon sa Cuneta Astrodome.
Human sa ilang sakit nga kapildihan niadtong Miyerkules, 97-104, gipagawas sa Ginebra ang tanan nilang hinagiban sa opensa aron mapukan ang ilang karibal nga Alaska.
Gipabuthan dayon sa mga bigmen sa Ginebra nga silang Japeth Aguilar ug Greg Slaughter ang depensa sa Alaska aron makuha ang 21 puntos nga labaw, 35-14 sa 2:35 sa first period.
Gikan didto, wala na molingi pa ang Ginebra ilabi na nga miposte kini sa ilang kinadak-ang labaw nga 26 puntos, 55-29 sa katapusang dos minutos sa second quarter.
Si Aguilar, kinsa nagsaulog sa iyang adlaw'ng natawhan kagahapon maoy leading scorer sa Ginebra pinaagi sa iyang 29 puntos, samtang si LA Tenorio adunay 22 puntos ug si Mac Baracael ug Mark Caguioa miamot og 12 puntos matag usa.
Ang nanamilit nga Alaska gipangulohan ni JV Casio, kinsa mikutaw og 16 puntos, gisundan ni Gabby Espinas nga miiskor og 14 puntos. (BANAT NEWS)