CEBU, Philippines - Atubangon na ni ALA Boxing Gym standout Rocky 'The Road Warrior' Fuentes (35-6, 20KOs) ang labing bug-at nga misyon sa iyang boxing career sa dihang iyang sangkaon si undefeated Thai prospect Amnat Ruenroeng (11-0, 5KOs) alang sa bakanteng IBF flyweight title karong adlawa didto sa Nakhon Ratchasima, Thailand.
Ang 27-anyos nga si Fuentes gitakda untang moharong ni McWilliams Arroyo sa IBF title eliminator niadtong Enero 25 didto sa Puerto Rico, apan ang away gikanselar dihang ang ALA Promotions ug ang ilang Puerto Rican counterpart wala magkauyon sa mga termino.
Si Fuentes dugay nang naghandum nga makaaway alang sa world title sukad siya misud sa pamuksing niadtong 2003.
Ang garbo sa Brgy. Mambaling, misaad nga iyang buhaton ang tanan aron madala niya inig pauli sa Pilipinas ang kalibotanong bakus
"Gihuwat gyud ni nako nga chance ug ako gyud buhaton tanan ug sa tabang sa Ginoo, I hope mahimo na kong world champion," matud pa ni OPBF 112-pound king nga si Fuentes, kinsa wala pa mapilde sukad niadtong tuig 2007.
Si Fuentes, kinsa adunay 15-fight winning streak, katapusang midaog pinaagi sa "unanimous decision" batok ni Mexican Juan Kantun niadtong Abril 20 didto sa University of Southeastern Philippines Gymnasium sa Davao City.
"Nindot og ma-knockout ang kontra kay iya man nga lugar pero andam sad ko moabot og 12 rounds," dugang pa niya.
Sa iyang bahin, si Villamor masaligon nga modaog ang iyang batos nga si Fuentes bisan pa og lugar sa ilang kontra.
"Anad na kaayo si Rocky moaway sa teritoryo sa kontra, salig ko sa iyang experience ug mindset," segun pa ni Villamor.
Wala usab sila malisang sa reputasyon ni Ruenroeng nga usa ka "Filipino Executioner" dihang iyang gipangpilde ang mga Pinoy boxers sama nila ni Louie Bantigue, Danilo Pena, Michael Rodriguez ug Julius Alcos.
"Maayo siya kay former Olympian pero wa pa siya kasugat og pareha'g estilo ug kusog ni Rocky,†dugang pa ni Villamor.
Ang 34-anyos nga si Ruenroeng maoy reigning IBF Pan-Pacific ug IBF Asia flyweight champion. (BANAT NEWS)