CEBU, Philippines - Sugbuanang long-distance running star nga si Mary Joy Tabal mihipos na sab og korona pinaagi sa paghari sa All-Filipino category sa 7-Eleven 1000 run didto sa Aseana City sa Parañaque.
Ang bag-ong gikoronahan hara sa National Milo Marathon midaog isip laing paspas nga Pinoy ug mipuwesto sa ikaduha sa overall sa 21K premier division.
Mikampiyon sab si Tabal sa 21K half-marathon division sa Cebu City Marathon ning bag-o lang.
Gitahod si Tabal isip women's champion sa All-Filipino division human niya gitapos ang lumba sud sa usa ka oras, 22 minutos ug 38 segundos sunod ni Kenyan Jachline Nzivo, kinsa mi-oras og 1:20:15.
Gawas sa Paris Marathon karong summer, si Tabal nangandam na karon alang sa iyang pagdagan sa Beijing International Marathon ning tuiga dihang ang 7-Eleven misaad sa top three male ug female Filipino runners moabaga sa tanang gasto didto sa Beijing.
Ang mga karibal ni Tabal nga si Mary Grace Delos Santos ug Aileen Tolentino madala sab alang sa Beijing Marathon.
Si Cebu City Marathon champion Jackson Chrichir sa iyang bahin, miangkon sa iyang ikaduhang kadaugan ning buwana dihang iyang gidominar ang 21K men's open sa oras nga 1:06:19.
Sa laing bahin, ang top three Pinoy male runners kinsa modagan sab sa Beijing Marathon naglakip nilang Elmer Sabal (1:11:41), Mario Maglinao (1:14:13) ug Alley Quisay (1:15:56).