CEBU, Philippines - Gitapos sa Team Suzuki-BMR-Zic Racing ang ilang 2013 season pinaagi sa paghakot og mga dungog sa final leg sa Visayas-Mindanao Regional Underbone Grand Prix (RUGP) series sa miaging semana didto sa Cagayan de Oro City.
Human siya mahimong runner-up sa miaging lima ka legs, si Mario Borbon miladlad sa tanan niyang katakus aron makampiyon sa expert 130 underbone category. Ikaduha sab siya sa expert 4AT open scooter ug ikatulo sa expert open underbone.
Sa laing bahin, si Neil Perino mao sab ang milangkat sa korona sa beginners 4AT scooter. Midaog sab siya og duha ka third place trophies kortesiya sa 100-124cc superstock ug novice 160.
Mitunol sab si John Louis Chan og dungog ngadto sa Suzuki-BMR-Zic pinaagi sa pagpahiluna sa ikatulo sa novice 130 underbone.
Labaw nang halandumon ang adlaw sa Suzuki-BMR-Zic dihang si Perino maoy napiling RUGP Rookie of the Year, salamat sa suporta nga gihatag ngadto kaniya sa Suzuki Philippines, FDR Tires, Zic 4T racing oil, KYT helmets, SpcV performance parts, Rextor CDI ug Fox shox.
Ikaduha na kining higayon sa Suzuki-BMR-Zic racing nga midaog og ROY award human ni Chan.
Si Vingie Coloma sa Yamaha-Petronas-Mackyworx maoy napili isip Rider of the Year, si April King Mascardo sa Suzuki Phoenix Vman ang top immediate expert rider ug si Durraine Dan Carlos sa Petronas Mototek Mapco maoy best novice rider ug Suzuki Nex 115 rider of the year. (BANAT PALARO)