CEBU, Philippines - Gitapos sa Philippine boxing team ang ilang kampanya sa 27th Southeast Asian Games pinaagi sa paghakot og tulo ka gold medals ug upat ka silver medals didto sa Myanmar.
Sa light-flyweight class, midaug og gold si Josie Gabuco human siya modaug batok kang Beatrix Suguro sa Indonesia pinaagi sa majority decision sa women's boxing.
Ang mga Pinoy didto sulod sa boxing gym, nagtuo nga maoy modaug si Nesthy Petecio alang sa ikaduhang gold medal sa Pilipinas sa boksing sa women's featherweight class.
Si Petecio kinsa maoy unang Pinoy boxer nga miabante sa finals, maayo untang nakaaway apan napilde siya sa hometown girl nga si Nwe Ni Oo sa Myanmar pinaagi sa majority decision.
Ang mga judges sa maong sangka miiskor og 39-37, 39-37, ug 38-38 pabor sa Myanmar.
Ang kapildehan ni Petecio pait kaayong gidawat sa Philippine contingent apan daling nakabawi ang Pilipinas human sa kadaugan ni Olympian Mark Barriga batok ni Konelis Langu sa Indonesia ubos sa light flyweight category diin ang tulo ka judges mipabor kaniya sa iskor, 30-27.
Ang bantamweight nga si Mario Fernandez midaug sab og laing gold medal alang sa Pilipinas human sa iyang sikit kaayong unanimous decision victory batok kang Donchai Thathi sa Thailand nga natapos sa iskor, 29-28.
Sa laing Philippines vs. Thailand finals match, napilde si Junel Cantancio pinaagi sa split decision ngadto kang Sayiom Ardee sa Thailand ubos sa lightweight category.
Ang usa ka judge miiskor og 29-28 pabor kang Cantancio apan ang duha ka judges didto mopabor sa Thai boxer sa mao gihapong iskor.
Mas nakabentaha ang Thailand batok sa Pilipinas sa ilang head-to-head battle tungod kay si Dennis Galvan miyukbo sa mas taas nga si Wuttichai Masuk sa light welterweight division. (BANAT PALARO)