CEBU, Philippines - Kasaysayan ang puntariya karon sa Southwestern University (SWU) Cobras dihang ilang ikasangka ang Far Eastern University (FEU)
alang sa unang luna sa finals sa 12th Philippine Collegiate Champions League (PCCL) karong adlawa didto sa Fil Oil Flying V. Arena sa
San Juan, Metro Manila.
Sugdan ang kumbati sa alas-2 sa hapon.
Sa higayon nga modaog ang Cobras nga maoy PCCL Southern Islands champion sila maoy moabante sa finals.
Sa kasamtangan, bugtong ang University of the Visayas (UV) Green Lancers pa lang maoy provincial team nga miabante sa
finals niadtong sayong bahin sa 2000, apan napilde sila sa University of the East (UE) Red Warrriors.
Busa, ang UV Green Lancers lang sab maoy bugtong provincial team nga nakaangkon og labing taas nga pwesto sa PCCL isip
second placer.
Bisan unsa pay mahitabo sa finals kun ugaling moabante ang Cobras, makab-ot na sab sa Cebu ang runner-up finish sa PCCL.
Apan kun masuwertihan sab, sila maoy unang team gikan sa Sugbu sa kasaysayan nga mahimong PCCL champion.
Nagtabla karon sa 1-1 nga baraha ang upat ka teams human sa kadaugan sa La Salle batok sa FEU sa miaging adlaw, 80-60 ug
gilubong sab sa San Beda ang Cobras, 77-49 aron mopwersa sa "knockout showdown" ang duha ka duwa karong adlawa.
Human sila modaog batok sa reigning UAAP champion La Salle sa iskor nga 68-58 sa pagbukas sa PCCL Final Four niadtong
Lunes, kalit lang sab dayon misukarap ang Cobras diin nagpaila nga wala kanila ang gitawag og "consistency" sa duwa.
Ang ikaduhang luna sa finals ilogan tali sa La Salle ug sa NCAA champion San Beda. Ang modaog maoy makigsangka sa
modaog tali sa Cobras ug sa Tamaraws alang sa "best-of-three" finals series nga sugdan sa Lunes. (BANAT NEWS)