CEBU, Philippines - Maanindot kaayong duwa ang gidalit ngadto sa mga basketball fans kaniadtong Sabado dihang nagtabla sa 74-all ang UAAP champion De La Salle University Green Archers batok sa NCAA champion San Beda Red Lions sa ilang exhibition game nga gitawag og "Champions For a Cause" didto sa Smart Araneta Coliseum.
Human matabla ni Ola Adegun ang duwa sa iskor 743-all, may higayon pa untang modaug ang La Salle tungod kay na-itsa pa si Jeron Teng apan misipyat siya sa iyang medyo pinugos nga tirada.
Tungod kay usa man kadto ka exhibition game, wala'y overtime period nga gihatag ug miresulta kini'g 74-all stand-off.
Ang maong sangka tali sa duha ka higanteng collegiate teams dinhi sa nasud, gipahigayon aron kabahin sa makita ihatag ngadto sa mga biktima sa super typhoon Yolanda nga mihapak sa Leyte, Samar ug sa amihanang Sugbo kaniadtong Nobiyembre 8.
Mikita ang maong duwa og kapin usa ka milyon ka pesos. Ang maong exhibition game gipaluyohan sab sa Fil-Oil Flying V pinaagi sa ilang chairman nga si Mandy Ochoa.
Sa laing bahin, hugot sab kaayo ang sangka tali sa San Sebastian Staglets batok sa San Beda Red Cubs diin midaug ang Staglets sa triple overtime, 108-102 atol sa Philippine Secondary Schools Basketball Championship (PSSBC) finals kaniadto gihapong Sabado. (BANAT PALARO)