CEBU, Philippines - Turno na sab ni Donnie 'Ahas' Nietes (31-1, 17KOs) nga mohatag og dungog sa nasud sa iyang pagdepensa sa WBO light flyweight title batok ni Sammy 'Guty' Gutierrez (33-9, 23KOs) sa Mexico sa main event sa "Pinoy Pride XXIII: Filipinos Kontra Latinos" karong gabii didto sa Smart Araneta Coliseum.
Ang garbo sa Murcia, Negros Occidental nga si Nietes nga katapusang napilde niadto pang tuig 2004 laraw nga mobuak sa rekord ni anhing boxing legend Gabriel 'Flash' Elorde, ang labing dugay nga nahimong world champion nga milungtad og pito ka tuig.
"Wala kaayo ko naghuna-huna sa rekord pero kung makuha nako ni kay daku ni nga dugang sa akong kompiyansa isip boxer," matud pa ni Nietes, kinsa mitimbang og 108 lbs, sama ni Gutierrez atol sa official weigh-in kagahapon didto sa Robinson’s Glorietta sa Ortigas sa kaulohan.
Gusto ni Nietes nga masumpay ang kalampusan sa mga Filipino boxers nga gisugdan ni Nonito 'The Filipino Flash' Donaire Jr. ug labing uwahi ni Filipino ring icon Manny 'Pacman' Pacquiao.
"Gusto ko og impresibo nga daog para pud mahatagan og dungog akong mga kababayan ilabi na mga biktima sa bagyo ug linog," matud pa ni Nietes.
"Di ko kasulti unsa ka round pero ako gyud siya tumbahon. Mas sayo mas maayo," dugang pa niya.
Tuyo usab ni Nietes nga matumba si Gutierrez aron makapadangat siya'g ngil-ad nga mensahe ngadto ni Mexican Moises Fuentes, kinsa iyang ikasangka pag-usab sa Marso sunod tuig.
"Kun matumba ko ni siya (Gutierrez), mapakita nako ni Fuentes nga mas lisud nako itandi sa amo una nga away," saysay ni Nietes.
Silang Nietes ug Fuentes unang nagsangka niadtong Marso diha sa Waterfront Cebu City Hotel and Casino diin miresulta sa "majority draw" ang ilang sangka.
Sa supporting main event, si WBO minimumweight champion Merlito 'Tiger' Sabillo (23-0, 12KOs) manalipod usab sa iyang kalibutanong bakus batok ni Carlos 'Chocorroncito' Buitrago (27-0,16KOs) sa Nicaragua.
"Lisud pud ni siya (Buitrago) kay pareha ni nako nga way pilde pero salig ko sa ako preparasyon ug maningkamot ko nga matumba siya," matud pa ni Sabillo.
Atngan usab ang sangka ni Milan 'El Metodico'Melindo kinsa moaway batok ni Alfredo 'Torito' Rodriguez (29-2, 18KOs) alang sa WBO International flyweight diadem.
Laraw ni Melindo nga makabawi sa iyang estado isip contender sa 112 lbs. division human siya gipilde pinaagi sa unanimous decision ni WBO/WBA champion Juan Francisco Estrada niadtong Hulyo didto sa Macau.
"Impresibo ni akong away kay ako ipakita nga nakabawi nako human sa akong kapildihan, daghan kong nakat-onan ug mas nilambo pa akong skills."
Moaway usab sa fight card nga gipasiugdahan sa ALA Promotions ug sa ABS-CBN Sports mao ang ALA fighters nga silang Jason 'El Niño' Pagara ug AJ 'Bazooka' Banal.
Ang light welterweight prospect nga si Pagara (31-2, 19KOs) makigsangka ni Vladimir Baez sa Dominican Republic, samtang ang kanhi two-time world title challenger nga si Banal (29-2, 21KOs) makigbatok ni Lucian Gonzales sa Puerto Rico. (BANAT NEWS)