CEBU, Philippines - Wala'y kukaluoy nga gitamparos sa Gray team ang kaatbang nilang Blue team, 99-72 aron temporaryong magsolo sa liderato sa Home of Hope Christian Drug Rehabilitation Ministry Sportsfest 2013 niadtong miaging Biyernes didto sa Barangay Gun-ob gym sa Lapu-Lapu City.
Wala batia'g kulba ang Gray ilabi na sa last quarter diin ilang namentinar ang double digits nilang labaw.
Tulo ka players sa Gray ang miiskor og double figures sa pagpangulo ni Lemuel Cahig, kinsa mikabkab og 27 puntos. Si Ian Dale Vismanos mitikdol og 16 puntos, gisundan ni Nelson Aguilar nga mitimang og 14 puntos alang sa Gray nga kasamtangang nagbitbit og 3-1 nga baraha.
Ang Blue nga adunay 2-2 win-loss record gipangulohan ni Gino Amodia sa iyang career-high 28 puntos, si Giovanni Gonzalez mikagis og 25 puntos.
Sa laing aksyon, gipilde sab sa Red team ang Yellow, 48-38 sa pagpangulo ni Ruel Allocod, kinsa mikimada og 18 puntos, samtang si Mark Qua mao sab ang nangulo sa Yellow pinaagi sa iyang 25 puntos, apan wala kapusli ang daku niyang puntos kay nahiagom sila sa ilang ikatulong pilde batok sa usa ka daog. Ang Red adunay 2-2 nga baraha sa kasamtangan.
Ang mga duwa gidumala ni league commissioner Nelson Aguilar uban sa mga board nga silang Gino Amodia, Ruel Allocod ug Joselito Diores.
PUNTOS MATAG USA
Unang duwa:
GRAY (99) - Cahig 27, Vismanos 16, Aguilar 14, Basubas 5, Gabiana 5, Dayupay 4, Federicos 2, Elesterio 2
BLUE (72) - Amodia 28, Gonzalez 25, Bartolome 12, Maceren 5, Darrell 2
Ikaduhang duwa:
RED (48) - Allocod 18, Naguana 8, Lequin 8, Ursal 6, Sabijon 4, Adolfo 4
YELLOW (38) - Qua 25, Tiu 4, Patencia 4, Buico 3, Cabanig 2