CEBU, Philippines - Ang Sugbuanong tennis player nga si Jan Godfrey Seno ug ang bisitang si Erika Manduriao maoy mangu sa mga finalists sa PSC-PHILTA Junior Tennis Championships didto sa CITCI-Consolacion Tennis Club courts sa Laray, Consolacion.
Si Seno nakakuha'g duha ka pasaporte sa finals human gipilde si Manuel Navales, 6-1, 6-3 sa boys 16 semis ug midaog pinaagi sa "default" batok ni Joshua Kinaadman sa boys 18.
Iyang harungon silang Manuel Balce ug Clyde Bienes sa boys 16 ug 18 finals.
Miabante si Balce sa finals pinaagi sa pagmakmak ni Francis Lambayan, 7-5, 6-2, samtang si Bienes pabiling buhi alang sa titulo sa boys 18 class human gipilde si Mikel Lauron, 6-1, 0-6, 12-10.
Sama ni Seno, si Manduriao nakakuha sab og duha ka lingkoranan sa finals sa mao gihapon nga age-group ni Seno.
Si Manduriao moharong ni Dominique Ong sa girls 18 finals ug sa garbo sa Sugbu nga si Jana Pages sa girls 16 division.
Sa laing bahin, ang managsuong Salimbangon nga sila si Kara ug Cesar Kristofer mipasilong sab sa finals. Si Kara makigsangka ni Zethley Mae Alferez alang sa bulawang medalya sa girls 14 class, samtang si Cesar Kristofer makigbatok ni Jace Onto sa boys 12 division.
Ang lain pang mga finalists mao sila si Elaine Rose Bahonsua batok Mariel Ann Villa sa girls 12 ug Wilbert Noel batok John David Velez sa unisex 19-under. (BANAT NEWS)