Aegis hari sa North Conference CSCC E-League

CEBU, Philippines -  Giharos sa Aegis Vipers ang duha ka duwa batok sa karibal nilang Stream Ingenyouity, 53-41 sa ilang "best-of-three" series aron sakmiton ang korona sa Northern Conference sa 9th CSCC E-League basketball tournament niadtong Sabado didto sa City Sports Club-Cebu gym sa Cebu Business Park.

 Si Dean Junber Escalon mihabwa og 14 puntos, samtang si Ryan Veloso mihakot og 12 puntos alang sa Aegis nga mihamag dayon sa opening quarter aron moposte'g 12-5 nga bentaha.
 Giinat pa sa Aegis ang labaw pinaagi sa 19-10 run sa third quarter nga naghatag kanila og 15 puntos nga abante, 41-26 paingon sa final period.
 Si Sylvester Millevo mao lang ang bugtong nakaiskor og double figures alang sa Stream pinaagi sa iyang 12 puntos.
 Sa Southern Conference finals, ang Lexmark Stallions miangkon sa Game-1 pinaagi sa pagpilde sa Accenture Sharks, 66-60 sa ilang kaugalingong "best-of-three" series.
 Maayo kaayong nakaduwa si Niel Tiempo diin miiskor kini'g 25 puntos aron pangulohan ang Lexmark. Si  Franco Angelo Cipriano miamot og 16 puntos alang sa maong kadaugan.
 Ang Accenture gipangulohan nilang Archie Brian Vincent Batua ug Ildefonso  Bulangis Jr. nga parehong miposa og 15 puntos, samtang si Jonathan Abesia miabuno'g 13 puntos. (BANAT NEWS)

 

Show comments