CEBU, Philippines - Gipalapdan ni Joseph Rojo ang iyang kampanya alang sa "Karter of the Year" dihang iyang gidominar ang sixth leg sa 2013
Kartzone Superkart Series sa miaging weekend didto sa Kartzone Racing Circuit sa Brgy. Kasambagan, ning siyudad.
Si Rojo, kinsa nanghawod sa KT expert division, nakahipos og 52 puntos aron mangulo sa mga kandidato alang sa KOY,
gisundan ni Jette Calderon nga mihipos og 45 puntos ug Sean Velasco sa iyang 29 puntos.
Mi-okupar gikan sa ikaupat hangtod sa ikasiyam nga dapit mao sila si Vince Rojo (26 pts.), JT Gullas (18 pts.), Panpan Reroma
(16 pts.), Justin Go (16 pts.), Rei Aleman (14 pts.) ug Earl Taborada (8 pts.).
Atol sa sixth leg, sila si Reroma ug Aleman maoy top two performers sa KT masters, samtang si Harold Go naghari sa KT novice,
gisundan nilang Vince Rojo ug Taborada.
Si Frederick Cortes mipukan ni Lord Seno aron maghari sa Honda expert, si Kim Limgenco mikawat sab og salida dihang iyang
gidominar ang Honda novice category batok ni Manu Miranda.
Sa mini ROK division, si Jarond Messina maoy migawas isip "best driver", samtang sila Liam Sacal ug Rap-Rap Gutierrez
mipahiluna sa ikaduha ug ikatulo nga dapit.
Si Gutierrez nakabitbit og champion's trophy pinaagi sa SQ cadet category human niya gipilde si Steven Aleman. (BANAT NEWS)