CEBU, Philippines - Collector sa Bank of the Philippine Islands (BPI)-Jakosalem branch nga si Glen 'Glendods' Colina mikolekta og 27 puntos alang sa White
team nga midaog pinaagi sa overtime batok sa Black team, 81-75 sa ilang unang duwa sa SRP Sunday Club Christmas League 2013
basketball tournament niadtong Domingo didto sa San Roque Parish gym sa barangay Subangdaku, dakbayan sa Mandaue.
Sa first period pa lang, si Colina nakahimo na og double digits nga nakatabang sa White pag-apas sa labaw human mabiyai og
otso puntos, 8-16 sa maong kuwarter.
Hapit angkona ni Colina ang tanang iskor sa first quarter diin mirehistro siya og 12 puntos. Si Colina mao sab ang nidominar sa
rebounding department. Si Gaga Obenza mitampo og sayes puntos alang sa White nga nakasikit, 18-20 paghuman sa unang 10 minutos sa
duwa.
Nailog sa White team ang momentum sa second quarter human kini milusad og 7-0 run, 27-20 uban sa mga paningkamot nilang
Alex Cabase ug Jolvicto Cabcaban.
Si Rogelio Lepiten miposa og three-pointer ug napun-an pa'g laing dos puntos aron mailog pagbalik sa Black ang labaw, 37-32
sa third period.
Nahimong kulbahinam ang duwa dihang nagsinukliay og mga puntos ang duha ka koponan hangtod nga nagtabla kini paingon
sa final period, 50-all.
Nag-ungaw na unta sa kadaugan ang Black human sila molabaw og dos puntos, 68-66 sa nahabiling uno minuto sa regulasyon,
apan si Colina mipasud sa iyang three-point shot aron hatagan ang White og usa ka palito nga labaw, 69-68.
Dili na unta mosangpot pa sa overtime ang duwa human magtabla ang iskor, 70-all sa himalatyong oras sa duwa, apan ang
naluya na nga si Colina, misipyat sa iyang duha ka free throws.
Sa dugang singko minutos, nalagsik pagbalik si Colina ug ingon man silang Cabase ug Melvin Abatayo nga grabe sab kaayong
migamit sa ilang hugot nga depensa.
Si Robert Sagayno mitusak og 11 puntos, samtang silang Cabase, Obenza ug Cabcaban miabuno'g 10 puntos matag usa alang
sa White.
Ang Black gipangulohan ni Lepiten, kinsa mirehistro og 20 puntos. Si Romeo Castardo nga misipyat sa iyang para daog unta
nga lay-up, miamot og 13 puntos.
Sa laing duwa, milansang sab og daog ang team Violet batok sa Gray team sa iskor nga 73-69.
Si Bernard Arreglo, kinsa wala na moduwa sa fourth quarter tungod sa back pain ug Fick Hanzel maoy topscorers sa Violet nga
parehong mikabkab og 12 puntos. Si Juanito Pilapil miamot og 10 puntos alang sa Violet nga nakarekober second half aron sakmiton ang
kuwatro puntos nga kadaugan.
Tulo sab ka players sa Gray ang mihimo'g double figures nga gipangulohan ni Eric Obra nga mipabuto og 25 puntos. Si Survilla
miiskor og 14 puntos, gisundan ni Renato Conahap nga mitampo'g 12 puntos.
Puntos matag usa
Unang duwa:
WHITE (81) - Colina 27, Sagayno 11, Cabase 10, Obenza 10, Cabcaban 10, Abatayo 6, Sadcija 5, Gonzales 2
BLACK (75) - Lepiten 20, Castardo 13, Chin 12, Claudio 11, Peligro 8, Teody 6, Dumoran 5, Fontanoza 2
Ikaduhang duwa:
VIOLET (73) - Arreglo 12, Hanzel 12, Pilapil 10, Aniñon 9, Migallen 8, Melencio 8, Caballero 4, Jamili 3, Amora 3, Pelarios 2,
Miñoza 2
GRAY (69) - Obra 25, Survilla 14, Conahap 12, Emilio 8, Bejasa 6, Rodriguez 2, Ceniza 2 (BANAT NEWS)