CEBU, Philippines - Mikulit na og kaugalingon pangan sa boxing ang kanhi Russian sparmate ni Manny Pacquiao nga si Ruslan Provodnikov human niya gisakmit ang WBO light welterweight title pinaagi sa usa ka 10th TKO nga kadaugan batok ni Mexican American Mike Alvarado kagahapon didto sa Denver.
Gibombahan og mga kusug nga kombinasyon ni Provodnikov si Alvarado kinsa naluya og wala na mibarug pa sa pagbagting sa eleventh round.
Napatumba na ni Provodnikov si Alvarado og kaduha sa eight round ug mipakita sa iyang kalig-on si Alvarado human makarekober, apan daw dili mapugngan ang mga bangis nga kumo sa Russian ug kini ang wala na maantos sa Mexican American.
“I knew I could break him," matud pa ni Provodnikov sa Associated Press."I don't care about the titles. It's all about the war today. I had to break his will and I did that."
Si Provodnikov misikat niadtong Marso human niya hapit mapilde si Tim Bradley sa ilang welterweight fight, apan nakuwangan siya sa swerte human makuha sa undefeated American ang unanimous decision nga kadaugan.
Sa maong kadaugan si Provodnikov mipalambo sa iyang record ngadto sa 23-2, 16KOs, samtang si Alvarado nakahiagum sa iyang ikaduhang pilde sa 36 niya ka away.
Unang napilde si Alvarado ni Brandon Rios niadtong miaging tuig, apan dali siyang nakabalik dihang gibawsan niya si Rios sa sayung bahin ning tuiga pinaagi sa usa ka dominanteng unanimous decision nga kadaugan.
Si Provodnikov usa usab sa mga boksidor nga gikuptan ni Hall of Famer Freddie Roach, apan wala kauban si Roach kaniya tungod kay ania kini sa Pilipinas alang sa training ni Manny Pacquiao.
Usa sa mga anaa sa korner ni Provodnikov sa maong kadaugan ang Pinoy trainer nga si Christopher Somodio. (BANAT NEWS)