CEBU, Philippines - Gipamatud-an sa team Makopa nga wala pa maaslom ang ilang abilidad dihang gikuniskunisan nila ang Tambis, 57-47 sa 40-above division sa Ibabao-Estancia "3rd Barangay Captain's Cup" basketball tournament didto sa Ibabao-Estancia Multi-purpose gym sa Mandaue City.
Ang managsuong Soco nga silang Wendell ug Sikoy maoy mikayod og maayo alang sa Makopa nga nagpauwan og mga puntos sa sayong bahin sa duwa aron motanom og 11 puntos nga labaw, 16-5 paghuman sa unang 10 minutos sa duwa.
Si Wendell mipupo og 18 puntos, samtang ang iyang maguwang nga si Sikoy miani og 11 puntos.
Kontrolado sa Makopa ang tibuok duwa, gani nitubo pa ang labaw ngadto sa 15 puntos sa halftime, 26-11 sa wala pa mokulit og 12 puntos nga kadaugan.
Naingkiban unta sa Tambis ang dakung labaw sa nahabiling 5:15 sa fourth quarter, 36-44 sa trayo nilang Boyet Mercader, John Reveche ug Alex Armenion, apan nausik ang ilang mga paningkamot kay ang Makopa misukli sab og mga puntos aron makuot ang kadaugan.
Ang naparot nga Tambis gipangulohan ni Mercader nga mikudlit og 17 puntos, gisundan ni Reveche nga adunay 11 puntos.
puntos matag usa
MAKOPA (57) - W. Soco 18, S. Soco 11, Bual 6, Cortes 6, Claverol 5, Villarin 4, Ceniza 3, Augosto 2, Virtudazo 2
TAMBIS (45) - Mercader 17, Reveche 11, Mercader 6, Armenion 5, Quimbo 2, R. Villafuerte 2, A. Villafuerte 1, Rosal 1 (BANAT NEWS)