CEBU, Philippines - Nakarekober ang Labarca MPC human masugamak sa una nilang duwa ug ilang gipahimungtan ang Super Nova pinaagi sa paglubong, 55-40 sa nagpadayong aksiyon sa Sitio Lower Suran Kinasang-an Basketball Tournament 2013 didto sa sitio Lower Suran Kinasang-at basketball court sa Pardo, ning siyudad.
Mitusak og 19 puntos si Wilmar Lozada aron pangulohan ang Labarca MPC nga nagbitbit na karon og 1-1 nga baraha.
Gidominar sa Labarca MPC ni coach Mamay Puzon ang kinatibuk-ang duwa. Ang Labarca MPC mirehistro og sayes puntos nga bentaha paghuman sa unang 10 minutos sa duwa, 19-13.
Nahulga hinuon ang Labarca MPC sa second period dihang misikit sa iskor ang Super Nova, 25-28.
Ang tandem nilang Lozada ug Bobby Cabaluna maoy nahimong instrumento sa Labarca MPC aron mainat ang labaw. Sukad niadto, wala na kini molingi pa hangtod nga naangkon nila ang 15 puntos nga kadaugan.
Ang Super Nova nga wala pa makatagamtam og daog sud sa duha ka duwa gipangulohan nilang Eugene Toh ug Revies Bangot nga mirehistro og nuybe puntos matag usa.
Ang liga usa sa mga kalihukan sa tinuig nga kapistahan sa ilang mahal nga patron Señor San Miguel Archanghel.
PUNTOS MATAG USA
LABARCA MPC (55) - Lozada 19, Rey Enriquez 8, So 8, Ro. Enriquez 6, Casas 4, Anoling 4, Gedion 2, Ybañez 2, Cabaluna 2
SUPER NOVA (40) - Toh 9, Bangot 9, Bonghanoy 8, Rafales 5, Adarna 5, Larry 2, Migallos 2