CEBU, Philippines - Duha ka Cebuano cagers ang malakip sa Philippine Under-16 national team nga moduwa sa FIBA-Asia U16 Championships sugod karong adlawa didto sa Tehran, Iran.
Ang duha nga adunay kahigayonan nga mohatag og dungog sa nasud mao sila si Arnie Padilla sa Sacred Heart School-Ateneo de Cebu (SHS-AdC) Magis Eagles ug Paul Desiderio, kinsa atua na miduwa sa University of the Philippines (UP) Maroons.
Sa wala pa siya mibalhin didto sa kaulohan, si Desiderio usa sa mga haligi sa University of the Visayas (UV) Baby Lancers sa Cebu Schools Athletic Foundation Inc. (CESAFI) diin siya nahimong MVP.
Sila si Padilla ug Desiderio mouban sa Phl Team line-up nila ni Mike ug Matt Nieto ug Jolo Mendoza sa Ateneo De Manila University, Carlo Abadeza ug Mike dela Cruz sa De la Salle University, Richard Escoto sa Far Eastern University, Diego Dario sa UP Integrated School, Enzo Navarro sa San Sebastian College, Mikel Panlilio sa Beacons Academy ug Jolo Go sa Hope Christian High School.
Ang Phl team ni coach Jamike Jaron napunta sa Group C uban sa India, Japan ug Jordan.
Ang Group A gilangkuban sa back-to-back champion China, Bahrain, Hong Kong ug Syria, samtang ang Group B mao ang Iran, Korea, Malaysia ug Thailand. (BANAT BALITA)