CEBU, Philippines - Usa na siya ka 18-anyos nga boxing veteran, apan migawas nga mas abtik ug kusgan ang world pound-for-pound king nga si Floyd ‘Money’ Mayweather sa iyang pagpilde ni Mexican ring star Saul ‘Canelo’ Alvarez pinaagi sa majority decision kagahapon didto sa MGM Grand Garden Arena sa Las Vegas.
Ang 36-anyos nga si Mayweather mikulit sa ika-45 niyang daog batok ni Alvarez aron masakmit ang WBC/WBA ug Ring Magazine light middleweight titles.
Gamit ang iyang kaidlas ug kamarunong, gipasudlan ni Mayweather og mga hait nga kombinasyon si Alvarez kinsa naglisud pagbasa sa lihok sa American boxer.
Nagkahiusa ang mga boxing analyst sa ilang pagtuo nga walay bisan usa ka round nga nadag-an si Alvarez, apan mimugna og gamay'ng kontrobersya ang usa ka judge nga si CJ Ross kinsa mitabla sa iskor 114-all.
Sila si judge Dave Moretti ug Craig Metcalfe mihatag 116-112 ug 117-111 pabor ngadto ni Mayweather.
Daghan ang misaway na usab tungod sa istilo ni Mayweather sa pagpunay og dagan ug pangupot, apan balewala ra kini sa Amerikanong boksidor ug nagtuo siya nga nindot ang iyang gipakita ug napamatud-an niya nga siya gihapon ang numero unong boksidor sa kalibutan.
“It's about skills," matud pa ni Mayweather sa Associated Press. "I came out tonight and displayed my skills. I'm happy with my performance."
Mismo ang 23-anyos nga si Alvarez ang miangkon nga lahi si Mayweather sa tanan niyang mga gikasangka ug naglibug siya kun unsaon pagpaigo ang iyang mga kinumo ngadto sa Amerikano.
"I could not catch him. I didn't know how to get him. He's very intelligent, very elusive and that's what he demonstrated tonight," matud pa ni Alvarez kinsa nakahiagum sa labing una niyang kapildehan sud sa 43 ka away. (BANATSPORTS)