CEBU, Philippines - Giihaw na sab sa University of San Carlos (USC) Warriors ang karibal nilang University of San Jose-Recoletos (USJ-R) Jaguars, 80-62 sa nagpadayong semifinal round sa 13th Cebu Schools Athletic Foundation Inc. (CESAFI) kagabii didto sa Cebu Coliseum.
Mga duwa karon
(Cebu Coliseum)
5:00 pm
CEC vs. UV (jrs.)
6:45 pm
USC vs. SHS-AdC (jrs.)
Ikaduha na kining higayon sa Warriors nga miihaw sa Jaguars, una niadtong ilang 80-59 nga kadaugan atol sa eliminasyon niadtong Septiyembre 3.
Didto gihapon magdaog sa depensa ug ingon man sa presensya sa Cameroonian recruit Ahmed Salihou, kinsa maoy gisaligan ug dangpanan sa Warriors sa rebound.
Nag-wild sab si Stephen Que aron pangulohan ang Warriors pinaagi sa iyang 21 puntos, lakip na ang duha ka triples. Nakatabang sab og daku si Salihou pinaagi sa mga undergoal shots aron moamot og 19 puntos, samtang si Ian Ortega mitampo'g 10 puntos alang sa Warriors.
Ang rookie pointguard nga si Rendell Senining maoy nangu sa Jaguars nga miburak og 19 puntos, gisundan ni Christian Parker nga adunay 12 puntos.
Ning pagsuwat, padayon pang nagtigi sa abilidad ang Southwestern University (SWU) Cobras ug University of the Visayas (UV) Green Lancers.
Sa laing bahin, human sila makatilaw og sakit kaayong kapildihan, daling nakarekober ang defending champion Sacred Heart School-Ateneo de Cebu (SHS-AdC) Magis Eagles human ilang gipilde ang UV Baby Lancers sa iskor nga 76-71.
Na-ejected si coach Delfin Pepito Jr. sa uwahing bahin sa first quarter human sa duha ka sunod-sunod ka technicals. Ang iyang assistant coach nga si kanhi Lancer Abel Bungcaras maoy temporaryong mitimon sa koponan.
Ang agresibong drive ni Jair Igna maoy mibuak sa ilang panagtabla, 71-all aron moabante tres puntos, 73-71 sa nahabiling 23.4 segundos. Siya usab ang nangu sa kadaugan sa Magis Eagles nga midagit og 28 puntos.
Gitapos ang duwa pinaagi sa free throws ni Arnie Padilla, kinsa mitusik og 24 puntos.
Karong adlawa, si Bungcaras lang gihapon ang mo-coach sa ilang duwa batok sa Cebu Eastern College (CEC) Dragons, kinsa midaog batok sa USC Baby Warriors, 79-72. (BANAT NEWS)