CEBU, Philippines - Mikulit sa ikaupat nilang sunod-sunod nga daog ang Southwestern University (SWU) Lady Cobras pinaagi sa pagpilde sa Cebu Doctors' University (CDU) sa 13th Cebu Schools Athletic Foundation Inc. (CESAFI) women's volleyball event kagahapon didto sa University of San Carlos (USC) gym.
Ang SWU miharos sa CDU spikers, 25-22, 25-12, 25-20.
Aduna pa sila'y nahabiling usa ka duwa sa eliminasyon diin ilang sangkaon ang University of Southern Philippines Foundation (USPF).
Sa dili pa ang SWU-USPF showdown, magsangka una ang ilang secondary girls sa usa'g-usa karong alas-6 sa gabii diha gihapon sa USC gym, samtang sa ikaduhang duwa, magsangka ang women's division title contender University of San Jose-Recoletos (USJ-R) batok sa CDU.
Mao kini ang unang duwa sa SWU secondary girls, samtang ang USPF naglaraw sa ilang sunod-sunod nga daog.
Kasamtangan karon nag-una ang USC sa girls division sa ilang 2-0 nga baraha human gipilde ang Sacred Heart School-Ateneo de Cebu (SHS-AdC), 25-18, 25-19.
Sa secondary boys division, ang USPF nagsolo karon sa liderato human miposte sa ikaduha nilang sunod-sunod nga daog batok sa Don Bosco Technology Center (DBTC), 25-20, 25-15. (BANAT NEWS)