CEBU, Philippines - Wala damha nga ang labing unang daog sa Don Bosco Technology Center (DBTC) Greywolves mahitabo sa ilang katapusang duwa.
Ang Greywolves miiskor og "come-from" behind nga kadaugan batok sa University of San Jose-Recoletos (USJ-R) Baby Jaguars pinaagi sa paglubong sa iskor nga 70-54 sa pagtapos sa eliminasyon sa 13th Cebu Schools Athletic Foundation Inc. (CESAFI) basketball tournament kagabii didto sa Cebu Coliseum.
Ang Greywolves, kinsa maoy nakakuha sa ikawalong puwesto, samtang ang Baby Jaguars nagbitay sa ikasiyam sa standings. Pareho silang nagbitbit og 1-7 nga baraha ug pulos na sab nangataktak.
Si Steven Angelo del Campo, anak sa kanhi Jaguar pointguard Freddie Del Campo maoy nagtimon sa kadaugan sa Greywolves nga mibahog og 28 puntos diin 13 niini iyang nahimo sa fourth period.
Ang Baby Jaguars gipangulohan sab ni Kherlie Pino, kinsa mikawhat og 20 puntos, apan wala makahuygo ang ilang three-point artist nga si Bryan Divinagracia nga wala maka-iskor sa maong duwa. Wala usab kaayo maka-arte silang Vince Castro ug Wyndell Casquejo.
Ang quarterfinal round sugdan karong adlawa didto sa airconditioned USJR-Basak Campus gym. Libre kini alang sa mga CESAFI fans.
Dili pa mahibaw-an kun kinsa ang ikasangka karon sa Cebu Eastern College (CEC) Dragons tungod kay ning pagsuwat kagabii, nagpadayon pa ang ilang duwa batok sa University of Cebu (UC) Junior Webmasters.
Sa higayon modaog ang Dragons, ilang ikasangka pag-usab ang UC, kinsa maoy No. 7, apan kun mapilde sangkaon nila ang University of Southern Philippines Foundation (USPF) Baby Panthers.
Puntos matag usa
DBTC (70) - Del Campo 28, Lapina 9, Aliganga 9, Asignar 6, Zarco 6, Ortega 5, Dela Torre 4, Itaas 2, Matias 1
USJ-R (54) - Pino 20, Castro 11, Casquejo 7, Hugo 6, Huevos 2, King 2, Sejuela 2, Ponte 1 (BANAT NEWS)