CEBU, Philippines - Human sa unom ka tuig, hingpit na gyud nga mahitabo ang dugay nang gipaabot nga rematch tali sa duha ka magkaribal nga sila si kanhi four-division world champion Nonito Donaire ug Armenian knockout artist Vic Darchinyan.
Kini human si Top Rank Inc. CEO Bob Arum na ang miingon nga opisyal na nga nagkasinabot ang duha ka kampo alang sa usa ka sangka sa Nobiyembre 9 didto sa Texas.
“This is a good fight for Vic and he is been waiting for this for many years,†matud pa sa manager ni Darchinyan nga si Frank Espinoza sa boxingscene.com.
Si Darchinyan dugay nang nagpanikad nga ikasangka pag-usab si Donaire nga maoy mipilde kaniya niadtong tuig 2007 pinaagi sa usa ka fifth round knockout aron mailog ang iyang IBF/IBO flyweight belts.
Ning higayuna ang duha ka boksidor magsangka alang sa 126 lbs. division nga maoy bag-ong timbang nga awayan ni Donaire.
Si Donaire katapusang miaway sa 122 lbs. division diin nahubuan siya sa iyang WBO ug WBA title ni Cuban superstar Guillermo Rigondeaux pinaagi sa unanimous decision didto sa New York.
Tungod niini laraw ni Donaire nga makahimo og usa ka impresibong kadaugan sa iyang comeback fight batok ni Darchinyan aron mabalik ang salig sa iyang mga fans. (BANAT SPORTS)