Niadtong Sabado, Agosto 24 samtang mitambong ko'g seminar/workshop kalabot sa "Conflict Management" didto sa Cebu City Hall nga gidumala ni Atty. Edmund Mirasol sa regional office sa National Conciliation and Mediation Branch, nakadawat ako'g usa ka text message gikan sa among sports editor sa The Freeman nga si Emmanuel 'Manny' Villaruel nga nagpahibalo kanako nga iya kunong nakita sa dakung bulletin board sulod sa Cebu Normal University (CNU) ang ngalan sa akong anak ulitawo nga si Matt Erikson, ang chairman/coordinator sa CNU-Supreme Student Government nga maoy kampiyon sa 2nd Green Fashion Revolution nga gipasiugdahan sa Ramon Aboitiz Foundation Inc. (RAFI).
Kaniadto pang Agosto 3 nahitabo ang maong contest didto sa SM Trade Hall ug igo lang nako gi-congratulate dinhi sa SPORTSgab ang maong kalamposan niadtong isyu sa Agosto 5. Wala lang nako kadto hatagi'g dakung pagtagad kay humana nako masuwat sa "miscellaneous" sa maong isyu. Lain sab paminawon kun ako ra sab maoy magsige'g dayeg-dayeg sa akong anak kay natural man sa usa ka ginikanan nga mohatag suporta sa iyang mga anak.
Ang ako untang gihuwat nga adunay laing tawo nga maoy modayeg kang Matt ug miabot gyud ang panahon nga wala pa matapos ang buwan sa Agosto, hisayran gyud ni Manny, kinsa usa sab ka mapasigarbuhong alumnus sa CNU. Matud pa niya nga didto siya sa CNU Campus aron magkuha sa iyang alumni plastic card.
Didto siya masayod nga lakip si Matt sa maong contest ug nagbunga ang ilang kahago nga usahay gani kaadlawon na siyang mopauli kay lagi nagsige sila’g rehearsal. Mao gyud tingali kini ang giingon sa taga-CNU nga "once a Normalite, always a Normalite." Ingon ana sila ka-mapasigarbuhon sa ilang alma mater.
May katarungan gyud kuno akong bation og kalipay tungod sa akong liwat kay ang mangga dili man kuno mamunga og santol ug gani matud pa gyud niya, siya maoy nagsige'g panghambug nga kana si Matt anak na sa akong kauban writer sa Freeman. Salamat kaayo Manny Boy for "spreading the gospel" hehehe.
Sa mao gihapong adlaw sa among seminar niadtong Sabado, mi-text ako sa akong dalagitang anak nga si Nicole kun nilakaw ba ang iyang kuya Matt. Mitubag siya nga unya pang hapon Dy moadto siya sa Park Mall kay kuno nakadaog siya sa Balak Contest. Didto, ako dayong giingnan si Nicole nga mosurender nako sa iyang Kuya kay dihang miapil ko sa Sinulat Contest nga gipasiugdahan sa Sinulog Foundation Inc. wala gyud ko makadaog bisa'g third place lang.
Ang maong contest nga gipasiugdahan sa atong karibal nga pamantalaan, bukas sa tanang mga tinun-an sa dakbayan sa Sugbu. Ang titulo sa iyang balak "Ang Kinabuhi ug ang Basketbol†maoy midaog sa unang ganti diin nadawat niya ang ganting salapi ug certificate.
Tinuod alang sa mga tinun-an ang maong bangga sa balak apan usa lang ka butang ang akong nalimtan sa pagpangutana kang Matt ug kini kun pila sila ka buok ang miapil. Kuyaw man gud kaayo kun siya lang sab maoy bugtong nagpadala og entry.
Bitaw, Dong Matt, walay kabutangan sa among kalipay sa imong nakab-ot karon samtang nagtungha ka pa sa 3rd year sa kursong Bachelor of Science in Elementary Education (BEEd) major sa Special Education (SpEd).
Hinaut unta nga magpadayon ang imong maayong agi isip usa ka estudyante sa kolehiyo.
MISCELLANEOUS. Condolence to the family of Cebu Coliseum manager Ben Tulda for the death of his wife Eulogia Sabellano Tulda. A nightly vigil is being held at their residence in Poblacion, Pardo. Interment will be on
August 31. It was my friend Engr. Ariel Araw-Araw who informed me of the death of Tulda's wife.