CEBU, Philippines - Miiskor sa ilang ikaduhang daog ang University of San Carlos (USC) Warriors human ilang gipukan ang
University of Southern Philippines Foundation (USPF) Panthers, 69-55 sa 13th Cebu Schools Athletic Foundation Inc.
(CESAFI) niadtong Miyerkules sa gabii didto sa Cebu Coliseum.
Ang maong kadaugan nagtukmod sa Warriors ngadto sa ikaduhang puwesto uban sa University of the
Visayas (UV) Green Lancers ug University of San Jose-Recoletos (USJ-R) Jaguars sa managsama nilang 2-1 win-loss
records.
Mga krusyal nga baskets gikan nilang Miguel Plata ug Christian Laude maoy nagtimon sa Warriors nga
maglawig paingon sa laing kadaugan dihang miposte kini og 64-48 nga bentaha.
Si Plata miposa og upat ka sunod-sunod nga puntos alang sa ilang 60-46 nga labaw, samtang si Laude
miugkat og laing kuwatro puntos aron inaton ang labaw ngadto sa 64-48 sa nahabiling 3:35 sa duwa.
Wala makaduwa si Barry Amin alang sa Warriors tungod sa bun-og sa iyang walang paa ug gipapahuway
lang una aron kondisyon kini atol sa ilang sangka batok sa UV Lancers karong Domingo.
Laing Cameroonian recruit sa Warriors nga si Ahmed Salihou wala sab pabanata'g maayo aron masuta ang
abilidad sa ilang local players.
Gumikan niini, miaksiyon og dikit ang Panthers nga nakapugos ni Warriors coach Julian Macoy sa pagbalik ni
Salihou aron maseguro ang daog.
Si Plata maoy nangu sa Warriors sa iyang 15 puntos, samtang si Laude miamot og 13 puntos ug si Nico Magat
mitampo'g 10 puntos.
Ang 0-2 Panthers gipangulohan ni Art Camello pinaagi sa iyang 12 puntos, gisundan sa ilang rookie guard nga
si John Carlo Sano nga miabuno og 10 puntos.
Puntos matag usa
USC (69) - Plata 15, Laude 13, Magat 10, Salihou 6, Lim 5, Adlawan 5, Pepito 5, Seno 4, Ortega 3, Rabat
2, Oleodo 1
USPF (55) - Camello 12, Sano 10, Sollano 9, Badrina 7, Escanilla 6, Batac 5, Smith 3, Romande 2
(BANAT NEWS)