Samtang naglista ako sa boxscores sa duwa tali sa Sacred Heart School-Ateneo de Cebu (SHS-AdC) Magis Eagles batok sa University of the Visayas (UV) Baby Lancers, miduol kanako ug sa uban pang mga sportswriters ang usa sa mga sakop sa screening committee sa Cebu Schools Athletic Foundation, Inc. (CESAFI) nga si Dioscoro Himotas, ang kanhi athletic director sa University of San Jose Recoletos ug iyang gipang-apud apod kanamo ang usa ka suwat gikan ni Commissioner Felix Tiukinhoy, Jr. nga iyang giduso o gi-address ngadto kang CESAFI president Fr. Manny Uy, SJ.
Ang maong suwat nga gipetsahan og Agosto 16, 2013, adunay nakabutang nga subject: re: Mr. Scott Aying's Eligibility.
Tungod lagi kay mideresto man ako sa internet cafe aron suwaton ang resulta sa duwa tali sa Magis Eagles kinsa midaug batok sa Baby Lancers, 78-60 niadtong Sabado sa gabii, Agosto 17, wala nako matarung og basa ang maong suwat ug ilabi na gyud kay misunod dayon ang sangka tali sa defending champion Southwestern University (SWU) Cobras batok sa UV Lancers diin naka-eskapo na sab ang Cobras, 70-66 sa usa ka kulbahinam kaayong duwa.
Didto na nako mabasa pag-ayo ang upat ka pahina nga suwat ni Tiukinhoy sa ako nang pag-uli sa balay ug didto nahipugwat dihang gawas sa nahisgotang eligibility ni Aying nga maoy unod o subject sa maong suwat, mirekomendar sab si Tiukinhoy ngadto sa CESAFI board nga pahamtangan og suspenso nga usa ka tuig ang coach sa University of San Carlos (USC) Baby Warriors nga si Britt Carlo Reroma, ang coach ni Aying, tungod sa iyang pagpasulod niini atol sa ilang sangka batok sa UV Baby Lancers sa opening day sa 13th season niadtong Agosto 3 diin midaug ang Baby Lancers, 77-74 diha sa Cebu Coliseum.
Matod pa ni Tiukinhoy nga kinahanglan gyud kunong mo-explain si Reroma kung nganong iya kadtong gibuhat nga unta nasayod naman siyang daan nga dili kalipikadong moduwa si Aying ilawon sa residency rule. Gani, gibasol pa ni Tiukinhoy si Reroma nga mao hinuo'y hinungdan nga na uwawan sa publiko si Aying nga gusto untang mosaksi niadtong duwaa ug ingon man ngadto sa mga ginikanan ni Aying kay kung gituman pa lang gyud kuno unta ni Reroma ang lagda sa CESAFI, dili na unta kuno kadto mahitabo tungod kay sulod sa iyang 15 ka tuig isip commissioner sa CESAFI (ang duha ka tuig sa naghinapos nga CAAA), si Reroma lang kuno'y nakahimo pagpasulod og ineligible player.
Niadtong miaging Martes, Agosto 13, nagkanayon si Tiukinhoy sa iyang suwat nga mibisita kaniya ang USC Students Affairs Director nga si Bro. Rolando Sanchez ug nagpakisayud sa maong hitabo busa iyang gisaysay ang kamatuoran nga nagtumbok lang gihapon sa CESAFI rule sa eligility.
Nagkanayon si Bro. Sanchez dili sila makadali-dali'g hilabot unsay mga panghitabo kay ang USC-Basic Education Department, usa ka autonomous nga institution apan mitubag si Tiukinhoy nga bisan pa'g dunay autonomy ang USC Basic Education Department, ila unta pahibaw-on ang presidente sa USC nga si Fr. Dionisio miranda, SVD kung unsay nasabotan atol sa ilang meeting ug kung duna sila'y mga hangyo isip pagtamud sa labing taas nga opsiyal sa unibersidad.
Wala sab makauyon si Tiukinhoy sa migawas sa media (dili sa Freeman ug Banat) nga migawas didto sa sports page ang usa ka artikulo nga "USC vs. TIUKINHOY.
Matod pa ni Tiukinhoy, bahala na ang CESAFI board kung unsaon nila pagsabot kadtong maong sugilanon nga migawas sa pamantalaan.
Sa akong sabot sa gipamulong ni Tiukinhoy kanako, anaa ra sab sa board pagluwat og hukom kung pabor ba sila nga suspensoon si Reroma isip high school coach o dili.
Wala ako makasugod og tan-aw sa opening game tali sa Baby Lancers ug Baby Warriors ug maoy akong naabtan ang fourth quarter ug didto sab ako masayud sulod sa coliseum nga wala makaduwa si Aying kay dili kalipikado tungod sa residency rule nga duha ka tuig.
Ako na daan hipanglantawan nga mopadala sab og suwat ang USC kalabot niini ug ilang hagyoon nga dili lang suspensoon si Reroma. Hinaut unta nga madali kini'g kasulbad aron sab dili mahingawa ang iyang mga players nga nag-anam na karon og saka ang morale sa kasamtangan nilang 2-1 nga baraha.
Samtang naghisgot kita ni Aying nga dili makaduwa, didto sa nagpadayong UAAP Season 76, usa ka player sa University of the Philippines (UP-IS) nga kanhi gidid-an sa pagduwa, nakakuha'g TRO kon temporary restraining order gikan sa korte aron tugotan nga makaduwa'g balik.
Tuod man, mibalik og duwa si Jozhua General ug siya maoy nagbaswat sa UP ngadto sa 73-71 nga kadaugan batok sa University of Santo Tomas kaniadtong Sabado nga didto gipahigayon sa Blue Eagle Gym.
Nakaduwa si General usa ka adlaw human makahuha'g 20 ka adlaw nga temporary restraining order (TRO) nga gihagoan og trabaho sa iyang mga ginikanan didto sa Quezon City Regional Trial Court batok sa UAAP Board’s ruling kalabot sa ineligibility karon nga season. Dali kaayong nabati o nabatyagan ang impact sa duwa ni General alang sa Junior Maroons human siya mohakot og 10 ka rebounds ug pipila ka assists bisan og igo lang siyang mihimo'g dos puntos sa maong duwa.
Tungod sa pag-epekto sa TRO, ang maong kadaugan mao na'y ikaduha alang sa Junior Maroons karon nga season lakip na niini ang ilang daog batok sa Adamson University Baby Falcons sa usa ka makutas kaayong sangka nga milanat ug upat ka overtime kaniadtong Hulyo 14 diin maka-ipsot sab sila'g dos puntos, 89-87 didto sa Mall of Asia Arena.
Sa ilang official statement kaniadtong Sabado, nagkanayon ang UAAP Board nga “will honor the TRO and will allow Joshua General to play in UP-IS’s games covered by the 20-day period.â€
Ang The TRO issue maoy tukion isip usa sa agenda sa UAAP board regular meeting unya sa Agosto 22.
Sa kasamtangan, si coach Allan Gregorio gusto gyung gamiton kanunay si General ilabi na kay solido kaayo ang suporta sa school’s alumni association ngadto sa UPIS.
MISCELLANEOUS. Advance birthday greetings to Michaela Gonzales who will turn 10 years old on August 21. Greetings coming from his father Noel Medalle.