CEBU, Philippines - Sa gilauman, ang defending champion University of Cebu (UC) Webmasters mao gihapon ang miarangkada
pagsugod sa secondary division sa unang adlaw sa kompetisyon sa 18th Milo Little Olympics Visayas Regional Finals
kagahapon didto sa Cebu City Sports Center (CCSC).
Ang mga banggiitang swimmers sa UC nga gipangulohan ni Michael Ichiro Kong maoy daku'g nahimo
pagdaog og bulawan alang sa koponan. Si Kong mikabkab og duha ka bulawan pinaagi sa secondary boys 200m
individual medley ug 400m freestyle didto sa CCSC Aquatic pool.
Si Kong mihimo og bag-ong rekord dihang iyang gitapos ang 400m freestyle sud sa upat ka minutos ug 41.34
segundos. Gibuak niya ang 17 ka tuig nga rekord ni Jose Ronel Dizon sa oras nga 4:44.59.
Ang teammate ni Kong nga si Karen Mae Indaya mihakot sab og mga bulawan sa girls 200m IM uban sa oras
nga 2:46.71 ug 400m freestyle sa oras nga 5:21, samtang si Danielle Mae Ballesteros mitunol og usa ka bulawan sa 200m
breaststroke sa oras nga 3:05.82.
Nidaog sab og laing bulawan ang UC pinaagi sa 400m freestyle relay.
Sa athletics, si Jan Moses Estrada mihatag sa UC sa ikapitong bulawan dihang nanghawod kini sa secondary
boys shotput event human milabay sa bolang puthaw sa gilay-on nga 10.92 metros. Si Rensel Rosales sa Tagbilaran Grace
Christian School maoy midaog sa gold sa girls division.
Sa laing bahin, ang 12-anyos nga si Maria Therese Gardose sa Guinsay Elementary School sa Danao City,
misakmit sa una niyang bulawan sa torneyo human manghawod sa elementary girls shotput sa gilay-on nga 6.22 metros. Si
Joseph Berdin sa University of San Carlos-BED maoy miangkon sa boys division. (BANAT NEWS)