CEBU, Philippines - Gipakuratan sa University of San Carlos (USC) Baby Warriors ang kanhi walay pilde ug solo leader Cebu Eastern College (CEC) Dragons pinaagi sa pagkulit og 77-69 nga kadaugan kagabii sa nagpadayong 13th Cebu Schools Athletic Foundation Inc. (CESAFI) didto sa Cebu Coliseum.
Gipamatud-an ni Baby Warriors coach Britt Carlo Reroma nga adunay ngipon ang iyang batos nga sarang ikasukol bisan wala makaduwa ang usa sa ilang sinaligan nga si Scott Aying ug may katarungan na karong mabalaka ang ubang teams tungod sa gipakita nilang katakus.
Mi-rally ang Baby Warrios gikan sa 15 puntos nga biya, 24-39 sa sayong bahin sa third period apan tungod sa maayong depensa uban ang kakugi, hinay-hinay kini nilang naapas ug gitapos ang maong period sa iskor, 48-50 human sa three-pointer ni Ian Orocio dela Cruz.
Nakabawi ang Dragons sa fourth quarter, 60-54 sa nahabiling 7:02 sa duwa, apan nakuha gihapon sa Baby Warriors sa depensa ang ilang biya ug mao nay nagkontrolar tungod sa mga turnovers nga nahimo sa Dragons.
Nailog pag-usab sa Baby Warriors ang labaw, 68-65 human sa laing three-pointer ni Dela Cruz ug sa basket ni Clint Suleto, 70-65 ug sukad niadto wala na nila tugoti nga molabaw pag-usab ang Dragons, kinsa nahiagom sa labing una nilang pilde sulod sa upat ka duwa. Bisan pa niini, ang Dragons mao gihapon ang nag-una sa standing sa ilang 3-1 nga baraha.
Ang Baby Warriors nga adunay 2-1 win-loss record, gipangulohan ni Dela Cruz sa iyang 15 puntos, samtang sila si Jed Robin Baltazar ug Kervin Villagracia miamot og 14 puntos matag usa.
Ang Dragons gipangulohan ni Mark Roa sa iyang 18 puntos, gisundan nilang Shann Christopher Tan ug Chris Mar Salac nga parehong midugang og 12 puntos.