CEBU, Philippines - Nag-una na sab sa team standing ang Goldberry Suites human sa ilang kadaugan pinaagi sa paglubong sa San Remigio Aguilas, 80-40 sa Sacred Heart Ateneo Alumni Basketball Athletic Association (SHAABAA) Mivesa Cup didto sa Sacred Heart School-Ateneo de Cebu basketball courts sa General Maxilom Avenue, ning dakbayan.
Gipakita sa Goldberry nga duna sila'y igong hinagiban nga ikasugakod tungod kay ang tanan nilang 14 ka
players nga gipasulod pulos nakapuntos. Si Joseph Lo maoy nangu sa iyang 13 puntos uban sa tulo ka rebounds ug duha ka assists, Sila si Stanley Ong ug Chad Canares miamot og 10 puntos matag usa alang sa Goldberry, kinsa wala pa mapilde sulod sa upat ka duwa.
Gipangulohan sab ni Ryan Lauro ang Aguilas nga mitusik og 21 puntos.
Sa laing duwa ang Gaisano Capital midaog sab batok sa A-Team sa iskor nga 58-50 alang sa ilang 3-1 nga baraha.
Silang Anton Solon ug Brian Downey maoy nahimong 1-2 punch sa Gaisano Capital sa maong duwa.
Si Dandan Tecson miiskor og 28 puntos aron pangulohan ang pilderong A-Team.
Sa lain pang aksiyon, ang Milco Fresh Eggs nakaipsot batok sa Alberto's Pizza sa iskor nga 65-62.
Ang duha nagsawo sa standing sa managsamang 2-2 win-loss records.
Nakatabla ang Alberto's sa iskor, 62-all human sa tirada ni Jonathan Cimafranca, apan mibawos ang Milco pinaagi sa three-pointer ni Theogene Lim.
Si Lim, kinsa maoy nakahimo sa winning basket miburak og 22 puntos, apan si Roderick Mangubat nga
nangulo sa kadaugan sa iyang game-high 24 puntos, samtang si Cecilio 'Boylit' Gillamac midugang og 15 puntos.
Ang Alberto's nga mao na lang ang team nga wala makatilaw og daog sa upat ka duwa gipangulohan ni
Christian Pepito pinaagi sa iyang 17 puntos. (BANAT PALARO)