CEBU, Philippines - Parehong naglukdo og uno punto nga kadaugan ang Noe's Ultrimix DJ ug Ibabao-Estancia batok sa tagsa- tagsa nilang kaatbang sa pagsugod sa Lapu-Lapu Sports Club (LLSC) 15-Under basketball tournament niadtong Hulyo 21 didto sa barangay Basak gym sa Lapu-Lapu City.
Ang Noe's Ultrimix DJ naka-eskapo bitbit ang 55-54 nga kadaugan batok sa Prime Hoops, samtang ang
Ibabao Estancia nakalingkawas sa kulbahinam gihapon nga duwa batok sa Haydell Crispy-UV sa iskor nga 49-48.
Si JR Mangubat mipugnit og 17 puntos ug si Ruel Sagang mipupo'g 12 puntos alang sa Noe's Ultrimix DJ nga milusad og 15-8 run sa second period aron moposte'g 27-22 nga bentaha paghuman sa maong kuwarter.
Nahulga ang Noe's Ultrimix DJ human nailog sa Prime Hoops ang momentum sa iskor nga 54-53, apan
mibawos sab dayon kini aron makalingkawas sa sikit kaayong kadaugan.
Ang Prime Hoops gipangulohan nilang Emman Yaun ug Clifford Cueto nga mikimada'g 16 puntos matag usa, gisundan ni Joshua del Mar sa iyang 11 puntos.
Sa laing bahin, tulo ka players sa Ibabao Estancia ang miiskor og double figures nga gipangulohan nilang Roger Quimbo ug Damolo nga adunay 12 puntos matag usa.
Mahatod unta ang duwa ngadto sa overtime dihang dos puntos lang ang labaw sa Ibabao Estancia, 49-47 sa nahibiling 10 segundos sa duwa, apan si Lando dela Rama nga nakakubit og foul igo lang mipasulod og usa sa iyang duha ka free throws hinungdan nga nasugamak ang Haydell Crispy-UV.
Si Humory Agbay mikadlit og 12 puntos, samtang si John-John Bicar mikagis og 11 puntos alang sa pilderong koponan. Si dela Rama mitikdol og nuybe puntos ug ang playmaker nga si Niño Nadado mitimbre og otso puntos alang sa Haydell Crispy-UV.
Ang torneyo gipaluyohan ni Basak Brgy. Capt. Belong Darnayla, Hon. Harry Radaza, Donbel Belano ug sa JB Sportswear.
PUNTOS MATAG USA
Unang duwa:
NOE'S ULTRIMIX DJ (55) - Mangubat 17, Sagang 12, A. Maloloy-on 8, J. Maloloy-on 8, Oximoso 4,
Ycong 3, Diola 2, Rupal 2
PRIME HOOPS (54) - Yaun 16, Cueto 16, Del Mar 11, Teves 7, Compayan 4
Ikaduhang duwa:
IBABAO ESTANCIA (49) - Quimbo 12, Damolo 12, Soco 11, Mercader 5, Claros 4, Judilla 2, Tuico 2
HAYELL CRISPY (48) - Agbay 12, Bicar 11, Dela Rama 9, Nadado 8, Linao 4, Francisco 2, Ochea 2 (BANAT PALARO)