CEBU, Philippines - Nakahiagum og sikit nga kapildehan ang Smart Gilas Pilipinas national team human sila patapsingi sa New Zealand All-Star, 86-85, niadtong miaging adlaw atol sa ikatulong adlaw sa ilang training camp sa maong nasud.
Human sa duha ka sunod-sunod nilang daog batok sa Hawkes Bay Hawks, naputol ang winning-streak sa mga Pinoy dihang gipilde sila sa All-Star team sa New Zealand National Basketball League.
Hinuon, wala mibati og kaguol si Smart Gilas head coach Chot Reyes tungod kay usa ka lig-on nga All-Star team ang ilang gikasangka nga adunay pipila ka mga dagkung American imports nga sila si Antoine Tisby sa Otago Nuggets, Marcel Jones sa Manawatu Jets, BJ Anthony sa Tall Blacks ug Kareem Johnson sa Hawks.
Nasentro sa depensa sa mga All-Stars ang sentro sa Gilas nga si Marcus Douthit rasun nga naglisud kini pagtabang sa opensa sa koponan, apan mipakita hinuon sa ilang abilidad ang ubang bigman sa national team nga sila si Japeth Aguilar ug Junemar Fajardo.
“Controlled most of the game until our bigs started to foul out or get in foul trouble. Great game though,†matud pa ni Gilas assistant coach Josh Reyes.
Ang Gilas sunod makigharung sa Wellington Saints ugmang adlawa, sundan sa South City Rangers sa Miyerkules sa dili pa nila atubangon ang New Zealand national team sa Huwebes. (LPM gikan sa InterAKTV.com)