CEBU, Philippines - Parañaque City - Ipakita na ni Merlito 'Tiger' Sabillo (21-0, 11KOs) sa ALA Boxing Gym ang iyang kalibre isip world champion sa pagdepensa niya sa iyang WBO minimumweight title batok ni Colombian challenger Jorle Jacinto Estrada (16-6, 5KOs) sa main event sa "Pinoy Pride XXI: When Worlds Collide" fight card karong gabii didto sa Solaire Casino and Leisure Park.
Si Sabillo mipadayag sa iyang kaandam sa iyang title fight nga giisip niya nga usa sa labing mahinungdanong sangka sa iyang karera ug paningkamotan niya nga mahatagan og dungog ang Pilipinas.
"Wala nay presyur, confident ko kay three months akong grabe nga training, chance na nako ni nga ipakita atubangan nila (Filipino fans) ang abilidad, tagsa ra ni nga chance ug ako ning pahimuslan," matud pa ni Sabillo, kinsa mitimbang og 104 lbs., mas bug-at og usa ka pound ni Estrada atol sa official weigh-in kagahapon.
Tumong ug tuyo ni Sabillo mao ang pag-iskor og knockout nga kadaugan, apan andam usab siya kun ugaling molungtad ngadto sa 12 rounds ang away.
Nasayod si Sabillo nga usa ka agresibo nga Estrada ang iyang sangkaon ilabi na nga tuyo niini nga mobawos alang sa kababayan niini nga si Luis de la Rosa, kinsa napilde pinaagi sa eight round stoppage ngadto sa laing ALA boxer niadtong Marso 9.
"Ako sa siya sukdon sa sayo nga rounds ug kun makakita nako'g abli ako siya suwayan pag-knockout," matud pa sa garbo sa Toboso, Negros Oriental nga si Sabillo.
Sa iyang bahin, si ALA Promotions founder Antonio L. Aldeguer miingon nga usa ka talagsaon nga boksidor si Sabillo ug daku ang iyang pagsalig nga makadepensa kini sa bakus.
"He fought in Colombia with a little chance but he proved people wrong , he is a very hard working fighter and I can say that it is his destiny to be a world champion, I am confident that he will win this one against the Colombian, sumala pang Aldeguer.
Sa supporting main event nga gipasiugdahan sa ALA Promotions ug sa ABS-CBN Sports, ang walay pildeng si Arthur Villanueva (21-0, 11KOs) mosuway pagsakmit sa WBO Asia-Pacific super flyweight title batok sa Mehikanong si Arturo 'Fuerte' Badillo (21-4, 19KOs).
Sa laing bahin, si AJ 'Bazooka' Banal (28-2, 20KOs) nga napakyas sa iyang kampanya alang sa kalibotanong titulo sa makaduha ka higayon, mohimo sa iyang comeback fight batok ni Mexican Abraham Gomez (18-7, 9KOs).
Moaway usab sa undercard si ALA Gym rising prospect Albert Pagara (16-0, 11KOs) nga makigsangka ni
Thai Khunkhiri Wor Wisaruth (9-4-1, 5KOs), ug ang kanhi amateur standout nga si Vic Saludar, kinsa mohimo sa iyang professional debut batok ni Juanito Hundante. (BANAT PALARO)