CEBU, Philippines - Inspirado nga mopakita'g nindot nga away si ALA Gym rising prospect Albert 'Prince' Pagara human siya mipirma og multi-year promotional contract uban sa ALA Promotions.
Ang undefeated nga si Pagara (16-0, 11KO), manghod ni light welterweight contender Jason Pagara mipirma'g kontrata nga mohatag kaniya'g higayon pagtuman sa iyang damgo nga mahimong world champion.
Karong Sabado, si Pagara mosugal sa iyang limpyong rekord batok sa Thai nga si Khunkhiri Wor Wisaruth sa supporting bout sa "Pinoy Pride XXI: When Worlds Collide" didto sa Solaire Resort and Casino sa Pasay City.
Si Pagara lab-as pa sa iyang unanimous decision nga kadaugan batok ni Jessie Tuyor niadtong Abril 6 didto sa Dauin, Negros Oriental. (BANAT NEWS)