CEBU, Philippines - Wala kapugngi ang pagmangats sa Far Eastern University (FEU) Tamaraws kinsa mimakmak sa University of the Philippines (UP) Fighting Maroons, 75-57 kagahapon sa nagpadayong UAAP Season 76 didto sa Mall of Asia Arena sa Pasay City, Metro Manila.
Ang maong kadaugan naghatag sa Tamaraws sa ilang 3-0 nga baraha ug misakmit sa solong liderato.
Si Terrence Romeo maoy nahimong best player sa Tamaraws sulod sa ikatulong higayon human siya moposa og 20 puntos samtang ang beteranong point guard nga si Ryan Roose Garcia midugang og 15 puntos.
Kutob lang sa first half medyo nakasikit ang Maroons kinsa aduna nay 0-3 nga baraha apan wala na sila makapugong sa opensa nilang Romeo, Garcia ug mga kauban didto sa second half.
Sa laing duwa, mihimo'g rally ang De La Salle University Green Archers didto sa third quarter diin ilang napapas ang ilang double-digit nga biya ug mipukan sa ilang higpit nga karibal ang Ateneo De Manila University Blue Eagles sa iskor, 82-73.
Na-outscore sa Archers ang Blue Eagles sa third period, 31-16 aron ma-apas ang ilang 34-48 nga biya. Sa tibuok first half, igo lang nakatigun og 28 puntos ang La Salle.
Migamit ang Green Archers og 16-2 run sa third period aron tablahon ang duwa sa 50-all hangtod nakahimo sila paglabaw.
Tungod sa maong kadaugan, duna na karo'y 2-1 nga baraha ang Green Archers samtang midailos sa 0-3 ang Ateneo nga maoy labing ngil-ad nilang pagsugod sukad niadtong 1997.
Si Almond Vosotros maoy nangu sa La Salle sa iyang 19 puntos ug midugang si Arnold Van Opstal ug 18 puntos. (BANAT PALARO)