CEBU, Philippines - Nakatukob na sab og daog ang Accenture Sharks aron magpabiling walay pilde sa 9th CSCC E-League Basketball Tournament niadtong Domingo didto sa City Sports Club-Cebu gym.
Ang Accenture nagsalig sa trayanggulo nilang Archie Brian Vincent Batua, Ryan Edward Llanos ug Julian Kyle Suerte aron mapukan ang Telstra-Teletech Titans sa iskor nga 87-80 alang sa ilang ikaupat nga sunod-sunod nga daog.
Si Batua mitiklo og 24 puntos uban ang 10 ka rebounds ug duha ka assists, si Llanos mihabwa og 20 puntos ug 10 ka rebounds, samtang si Suerte mikitkit og 18 puntos, uban ang tulo ka assists ug tulo sab ka steals alang sa Accenture nga maoy nagkontrolar sa duha human miposte og 24-21 nga bentaha.
Ang two-time champion nga Telstra-Teletech (0-3) gipangulohan ni Edsel Capillanos pinaagi sa iyang 17 puntos ug tulo ka assists, gisundan ni Clifford Amarado nga adunay 16 puntos ug pito ka rebounds.
Sa laing duwa, nagpabilin sab nga walay tatsa ang rekord sa Aegis Vipers human nila gilubong ang Kyocera Frontiers sa iskor nga 71-53 alang sa ilang 3-0 nga baraha.
Mibanat dayon ang Aegis pagsugod aron moposte og 14-5 sa first period ug sukad niadto wala na kini molingi pa sa naghangos nga Kyocera.
Tanang 14 ka players sa Aegis ang naka-iskor sa pagpangulo nilang Ryan Veloso ug Rudolfo Enterina III nga nagkumboya og 21 puntos, siyam ka assists, unom ka rebounds ug upat ka steals.
Si Ariel Ramonito Edera mitikdol og 15 puntos, samtang si Randel Tutor mitimang og 11 puntos alang sa Kyocera nga nakatilaw sa ilang ikaduhang sunod-sunod nga kapildihan.
Sa main game, ang Lexmark miinat sa ilang baraha ngadto sa 2-1 human sa ilang 52-48 nga kadaugan batok sa SSI Warriors.
Nabiyaan sila'g tres puntos, 10-13 sa unang kuwarter, apan milusad kini og 13-7 run sa second period aron mausab ang tiyempo sa duwa.
Si Jake Pia mao lang ang bugtong miiskor og double figures alang sa Lexmark pinaagi sa iyang 12 puntos uban ang tulo ka rebounds. Samtang si Lawrence Daven Dagas miiskor og 11 puntos mao sab ang nangu sa SSI nga nahiagom sa ikaduha nilang sunod-sunod nga pilde.
PUNTOS MATAG USA
Unang duwa
Accenture (87) - Batua 24, Llanos 20, Suerte 18, Bulangis 9, Abesia 6, Jumao-as 4, Tecson 4, Escaner 2
Telstra-Teletech (80) - Capillanes 17, Amarado 16, Ruiz 11, Medija 10, Banua 8, Delicana 4, Laurel 4,
Escuadro 4, Belena 3, Maxilom 2, Pardillo 2
Ikaduhang duwa:
Aegis (71) - Veloso 11, Enterina 10, Yballe 10, Navaja 8, Bas 6, Escalon 6, Alvarez 4, Gamallo 4, Palmere
3, Manzanares 2, Navaja 2, Palasuelo 2, Zanoria 2,Tudlasan 1
Kyocera (53) - Edera 15, Tutor 11, Cabiles 8, Panal 6, Cabarrubias 6, Tan 3, Alegre 2, Rodriguez 2
Ikadulong duwa:
Lexmark (52) - Pia 12, Cipriano 9, Talan 8, Ofonda 7, Villahermosa 5, Divinagracia 4, Solamillo 2, Tiempo
2, Villaluz 2, Torrepalma 1
SSI (48) - Agas 11, Tomakin 8, Campana 7, Garing 5, Poquita 4, Auditor 4, Rivera 4, Orbe 3, Ator 2 (BANAT PALARO)