CEBU, Philippines - Gisubhan sa 1&1 Marauders ang ilang title defense pinaagi sa paglubong sa Executive Boutique Lycans, 68-42 sa pagsugod sa CSCC E-League Season 9 basketball tournament niadtong Domingo didto sa City Sports Club-Cebu gym sa Cebu Business Park.
Nakasimhot og sayong kadaugan ang Marauders human kini miposte og 20-4 nga bentaha paghuman sa unang 10 minutos sa duwa.
Mi-rally ang Lycans sa second quarter, 36-24 ug nalaslasan pa kini ngadto na lang sa kuwatro puntos, 40-44, apan didto ra kutob ang ilang maayong labok kay ang Marauders milusad og 24-2 run aron tapuson ang duwa bitbit ang 26 puntos nga kadaugan.
Si Argiel Fernandez maoy topscorer sa Marauders nga adunay 14 puntos, gisundan ni Jan Isiah Gabest sa iyang 13 puntos.
Bugtong si Andrew Thomas John Hilvano lang ang miiskor og double digits alang sa Lycans pinaagi sa iyang 14 puntos.
PUNTOS MATAG USA
1&1 (68) - Fernandez 14, Gabest 13, Azarcon 6, Talan 6, Andrino 5, Nuñeza 4, Rafailes 4, Basañez 4,
Bastida 2, Camposo 2, Jamolla 2, Jamolla 1
Executive Boutique (42) - Hilvano 14, Santos 7, Regis 6, Lavador 6, Daumar 3, Bargayo 2, Barrientos 2,
Bacurnay 1, Fernandez 1