CEBU, Philippines - Gipamatud-an sa batan-ong Pusok Warriors ang ilang katakus ug kabatid sa duwang basketbol dihang gilubong nila ang Barangay Suba Basbas sa tinaktakay nga Game-3 sa iskor nga 95-82 pinaagi sa overtime aron masakmit ang titulo sa Seniors division sa bag-o lang natapus nga Lapu-Lapu City Inter-barangay Basketball Tournament 2013 didto sa Hoops Dome sa nahisgutang dakbayan.
Sa wala pa mipasilong sa finals, ang Pusok Warriors ni coach John Paul Alcaraz wala makasinati'g kalisud atol sa double round robin elimination ug sa semis.
Yano kaayo nilang gipangpilde ang ilang mga kaatbang gikan sa nagkadaiyang barangay sa Lapu-Lapu City hangtod nga miabot kini sa championship round.
Ang Pusok Warriors nanghasi dayon sa unang duha ka kuwarter, apan mikalma kini sa third period dihang gialkontrahan sila sa naghaguros nga opensa sa Suba Basbas.
Sa tantong paningkamot sa Suba Basbas, nakuha nila ang pabor nga nakaguba sa duwa sa Pusok Warriors.
Nagkapuliki sa pagpanagang ang Pusok Warriors ni barangay secretary Hermes Lutao sa mga bangis nga ataki sa Suba Basbas ug nagsinukliay kini sa ilang opensa nga nakapahugyaw sa duwa hangtod nga nagtabla ang iskor, 79-all hinungdan sa overtime.
Sa dugang singko minutos, maampingon na ang Pusok Warriors ug gawas pa niini nibalik na sab ang pagmangtas nilang Lloyd Solis, Mar Arriesgado, Joemel Baribe ug 3-point specialist Jun Saga aron magtambayayong pagsakmit sa korona.
Ang kanhi varsity player sa Phil. Merchant Marine School sa Las Piñas nga si Solis, kinsa ngilngig kaayong nakaduwa sa tibuok torneyo maoy napiling Finals MVP, samtang si Arriesgado nahimong seasons/conference MVP.
Nadasig sab ang Pusok Warriors pagsakmit sa korona tungod sa suporta sa kinatibuk-ang konseho sa barangay nga gipangulohan sa ilang maabtikon ug kugihan nga Brgy. Capt. nga si Engr. Boy Omolon ug ingon man sa Sangguniang Kabataan (SK).
Ang liga nga anaa na sa ikaupat ka tuig, gipasiugdahan ni City Councilor Harry Don Radaza.