CEBU, Philippines - Sugdan na ang second conference sa Cebu Elite Basketball League Friendship Cup 2013 karong Hunyo 9-12 didto sa University of San Carlos (USC)-North Campus gym.
Pormal nga gilusad ang maong kalihukan sa miaging gabii pinaagi nilang league organizer Chino Uy kinsa kanhi sakop sa USC Warriors nga nagduwa sa Cebu Schools Athletic Foundation, Inc. (CESAFI). Ang USC-NC sports coordinator ug Passarelle coach Galimar Largo maoy kaabag ni Uy sa maong proyekto.
Ang gikahinaman sulod sa upat ka adlaw nga torneyo mao ang pagbagat dinhi sa Sugbo sa Ateneo ug La Salle high schools teams. Kini tungod kay ang defending champion Sacred Heart School-Ateneo de Cebu (SHS-AdC) Magis Eagles nalakip man sa grupo sa De La Salle Santiago Zobel School gikan sa Manila uban sab sa University of San Jose-Recoletos (USJ-R) Jaguars kinsa mogamit sa ilang Team B.
Ang mga teams nga nahisakop sa Group A mao ang host USC Baby Warriors, Cebu Institute of Technology-University (CIT-U) Wildcats ug ang University of the Visayas (UV) Baby Lancers.
Ang format sa maong torneyo mao ang single round robin series diin ang top two teams sa matag bracket moabante ngadto sa crossover semifinals ug ang mga mananaug, moabante gilayon ngadto sa championship sa usa ka knockout match.
Ang maong torneyo magpakita sab sa coaching debut dinhi sa Sugbo ni kanhi San Beda Red Cubs champion coach Britt Carlo Reroma kinsa mao nay modala sa USC Baby Warriors.
Matod pa ni Largo nga nagrasyahan sila sa pagbalik ni Reroma dinhi sa Sugbo ug wala siya mag-usik og hiayon ila dayon kining gibira aron maoy mo-coach sa USC Baby Warriors. (BANAT NEWS)