CEBU, Philippines - Kung wala nay igong ikabuga ang San Marino Tuna-CIT-U karong hapona aron pakgangon ang Prime Asia Lending Corp.-UV, nagpasabot kini nga dili na gyud kapugngan nga ila na sab baswaton sa ikatulong higayon ang championship trophy sa CESAFI Partner's Cup nga gipaluyohan sa Enervon sa Game 2 sa ilang best-of-three title series didto sa Cebu Coliseum.
Ang bugtong duwa gikatakda karong alas 4 sa hapon.
Niadtong Huwebes, nakuha na sa Cebu Landmasters-USC ang ikatulong pwesto human sila modaug batok sa Gaisano Capital South-UC sa iskor, 79-76.
Daw dili na kalikayan nga haruson sa Prime Asia ang best-of-three series ug walay rason nga dili nila kini makab-ot tungod kay bisan asang por siento kung line-up maoy basihan, mas nakabentaha gyud ang Prime Asia, dili lang sa experience kung dili sa komposisyon sa ilang line-up nga dunay mipalig-on nga duha ka Cameroonian imports.
Mao na unya kini ang ika-15 nga sagunson nga daog sa Prime Asia sa maong torneyo.
Dili malalis adunay abilidad ang San Marino nga ikapakita kung unsa kakusog ang ilang all-local roster apan bisan pa kung unsa sila ka determinadong modaug, malupig ra gihapon sila sa lahutay.
Ang ilang otso puntos nga kapildehan sa game 1 igo na nga makapakumbensir sa publiko nga dii sila mayano-yano og lubong sa ilang kontra.
Gani milungtad ngadto sa fourth period ang pakigbisog sa San Marino apan tungod sa presensiya nilang Steve Cedrick Akomo ug Mike Harry Nzenssue nga parehong imports, nakabentaha og dako ang Prime Asia sa gitas-on ug ingon man sab sa gidak-on.
Ang tataw nga kapildehan sa San Marino karong hapona matawag lang gihapon nga usa ka kalamposan tungod kay susama sa Lion Tiger-USPF ug Raphael's Cafe-USJR, wala sila'y import.
Dili na sab kapugngan ang selebrasyon sa Prime Asia sa ila karong tumong pagdaug sa titulo.
Mahimong kuwang sa gitas-on ang San Marino apan wala sila magkuwang sa kakugi ug kursonada ug ila kining mahimo kung mag-ayo lang gihapon ang duwa sa ilang big four nga silang Joshua dela Cerna, Floyd Taboada, Allan Dimco ug Vincent Menguito.
Ang Prime Asia ni coach Felix "Donbel" Belano makasalig kanilang Wowie Escocio, Chris Perolino, Vincent Mendoza, Rhaffy Octobre ug John Michael Abad nga mao kanunay mangu sa ilang opensa.
Ang Lancers maoy morepresentar sa Pilipinas alang ngadto sa 27th Universiade didto sa Kazan, Russia unya sa Hulyo 6-17 diin ang ilang biyahe gi-sponsoran sa San Miguel Corporation ug sa ANI pinaagi sa Federation of School Sports of the Philippines (FESSAP) ug sa Basketball Association of the Philippines (BAP) ubos sa ilang presidente nga si Senador Antonio V. Trillanes IV. (BANAT NEWS)