CEBU, Philippines - Nakauna dayon ang Prime Asia Lending Corp.-UV batok sa San Marino Tuna-CIT-U sa best-of-three finals human sila mo-iskor og 91-83 nga kadaugan kaniadtong Huwebes sa Enervon CESAFI Partner's Cup didto sa Cebu Coliseum.
Daw sa natinuod ang gikabalak-an ni Prime Asia coach Felix "Donbel" Belano nga angay'ng dili kumpyansaan ang San Marino dihang mihimo'g mainitong rally ang nauwahi apan tungod sa ilang bentaha sa gitas-on, hingpit gyud nga naka-eskapo ang Prime Asia.
Naglabaw na unta og labing menos 19 puntos sa duha ka higayon sa third period ang Prime Asia apan hinay-hinay nga misikit ang San Marino nga bisan pa og wala sila'y import, igo lang silang napilde'g otso puntos.
Ang Prime Asia gipalig-onan sa ilang duha ka Cameroonian imports nga silang Steve Cedrick Akomo kinsa mitapos sa duwa sa usa ka kusog nga one-handed slam ug si Mike Harry Nzenssue.
Ang gamitoy nga point guard nga si John Michael Abad ug si Chris Perolino parehong miposa og 19 puntos aron pangulohan ang Prime Asia samtang silang Wowie Escocio ug Akomo midugang og 11 og 10 puntos, matag usa.
Nagmangtas alang sa San Marino ang ilang point guard nga si Floyd Taboa kinsa mibahug og 25 puntos ug midugang si Allan Dimco ug 21 puntos. Silang Joshua dela Cerna ug Vincent Menguito miamot og 18 ug 15 puntos, matag usa.
Ang Game 2 himoon karong Domingo sa alas kuwatro sa hapon diin kinahanglan lang modaug ang Prime Asia aron molampos sa ilang title-defense human sila modaug sa korona sa miaging tuig batok sa mao gihapong karibal nga nag-usab lang og corporate sponsor gikan sa KIA Motors ngadto na sa San Marino Tuna.
Sa sayo pa, kulbahinam ang sangka tali sa Cebu Landmasters-USC batok sa Gaisano Capital South-UC diin ilang giilogan ang ikatulong pwesto ug midaug ang Landmasters sa iskor, 79-76 aron maangkon ang third place trophy.
Si Nico Magat maoy nangu sa Cebu Landmasters sa iyang 23 puntos aron bawion ang bati niyang duwa batok sa San Marino sa miaging adlaw.
Ang Cameroonian import sa Gaisano nga si Arnud Noah mihakot og 37 puntos. (BANAT NEWS)