CEBU, Philippines - Human sa iyang impresibong kadaugan niadtong Sabado, si undefeated ALA rising prospect Genesis ‘Azukal’ Servania mipadayag sa iyang kaandam alang sa mas daku niyang away sa Hulyo 27 didto sa Macau City.
Si Servania midaog pinaagi sa third round knockout sa Pinoy Pride XX batok sa Indonesian nga si Isack Junior niadtong Sabado sa gabii didto sa Waterfront Cebu City Hotel and Casino.
"Ready na gyud ko, ako gyud paningkamoton nga nindot akong performance sa akong away didto sa Macau, grabe preparasyon alang ani," matud pa ni Servania nga moaway sa labing unang higayon gawas sa nasud.
Si ALA Promotions President Michael Aldeguer nagkanayon nga dugay na nilang gidumtan sa Top Rank Inc. nga ilakip si Servania sa usa sa ilang mga fight card ug malaumon siya nga modayeg si Top Rank Inc. big boss Bob Arum sa abilidad niini.
Sa maong away gipakita ni Servania nga kondisyon na siya alang sa iyang pakigsangka sa Hapon nga si Konosuke Tomiyama sa undercard sa giatngang WBO/WBC flyweight title showdown tali nila ni Mexican champion Juan Francisco Estrada ug laing ALA star nga si Milan Melindo.
Si Servania adunay rekord nga 20-0, 8KOs, samtang si Tomiyama nagbitbit og 23-5, 8KOs. (BANAT PALARO)