Conference Finals na. Gikan sa 16 ka teams, nahimong walo ug karon upat na lang gyud silang nagbarug. Mga duha ka semana kapin gikan karon, ato na sab masaksihan ang NBA Finals ug duha na lang gyud silang magtakos.
Naka-ingon ako nga ang wala gyud damha sa minilyon ka mga NBA fans nga ang Memphis maoy mo-abante sa West Finals human ilang gitagak ang no. 1 Oklahoma City Thunder ug finalist sa miaging tuig batok sa Miami Heat.
Kagahapon, lain na sab nga team kinsa wala damhang mo-abante human gipalagpot sa Indiana Pacers ang New York Knicks, 106-99 sa Game 6 aron taposon ang ilang best-of-seven series sa 4-2 nga baraha.
Game 1 karon sa Western Conference Finals tali sa San Antonio Spurs batok sa Memphis Grizzlies didto sa AT&T Center sa San Antonio, Texas. Unang mo-host ang Spurs sa duha ka duwa, ang Games 3 ug 4 mobalhin didto sa FedEx Forum sa Memphis, Tennessee.
Ang East Finals sa laing bahin tali sa Heat ug Pacers unya pa sugdan sa Miyerkules ug unang mo-host ang Heat didto sa American Airlines Arena sa Miami, Florida sa dili pa sab mobalhin ang mosunod duha ka duwa didto sa Bankers Life Fieldhouse sa Indianapolis, Indiana.
Makapakugang ang kalamposan karon sa Memphis ug dili ako mahibung nga kung sa higayon nga sila maoy mahimong West champion, adto ako modapig kanila batok sa Heat o batok sa Pacers ba hinoon.
Akong hipanglantawan nga kung pulos lang himsug tanan ang Spurs ilabi na si Manu Ginobili, makasustenir ang Spurs batok sa Grizzlies apan ang akong prediksyon niini ang Memphis maoy modaug isip West champions tungod kay usa sila ka maayong defensive team.
Kung atong kahinumdoman, dili pa lang kaayo dugay nga dihang maoy no. 1 ang Spurs sa West ug ang Grizzlies maoy no. 8, ilang gitagak ang Spurs. Busa, karon pa kaha nga ang Spurs maoy no. 2 ug ang Grizzlies no. 5?
Dugang pa niini, si Marc Gasol maoy Defensive Player of the Year ug laing tulo ka kauban mga maayo sab modepensa nga silang Zach Randolph, Tony Allen ug Mike Conley, Jr.
Sa habig sa Spurs, nahibalo silang Tim Duncan ug Tony Parker nga dili na sila mga batan-on kung itandi sa mga pambato sa Grizzlies. Usahay gani niadtong regular season, tuyoon ni coach Gregg Popovich nga dili dad-on si Duncan sa ilang mga road games ilabi na kung medyo huyang ang kontra aron makapahuway si Duncan ug butangan lang didto sa starting line-up column nga "DNP-Old" nga nahimo ganing sumsoman sa komedya kay ang buot pasabot niana "Did not Play-Old" ug ang usa ka DNP butangan man og "Coach's Decision."
Motapon kita didto sa East, mahimong defending champion ang Heat apan wala kana magpasabot nga dili sila mapilde sa Pacers.
Sakit unta sa akong kabubut-on nga modapig sa Memphis tungod kay sila maoy nagpilde sa akong paboritong team ang OKC Thunder (Seattle Sonics kaniadto), ang Grizzlies maoy akong pustahan kung sila maoy moabante sa NBA Finals.
Loyalty bet alang kanako ang paglaban sa Thunder kay duna ako'y iyaan ug ig-agaw nga kapin na sa 30 ka tuig nga nagpuyo didto sa Seattle. Dihang gipalit ni Clay Bennett ang Seattle ug gidala sa Oklahoma, nagpadayon ang akong pagdayeg kanilang Durant ug Westbrook, duha sa labing pioneer sa Sonics.
MISCELLANEOUS. The election fever last May 13 has given me a selected amnesia because I singled out the Mother's Day greetings but missing to mention the birthday of my son Matt Erikson who turned 19 last May 14 and I will also take this opportunity to mention our 20th wedding anniversary last May 16. Also belated birthday greetings to my father Jose Pilapil of the famous and influential PILAPIL CLAN of Liloan who is still energetic at 83 years old. Sorry to have missed the unexpected family reunion as I and my sister in Ormoc Gina M. Quindao missed the event.