CEBU, Philippines - Gipamatud-an sa Petracorta Brokers ang ilang kakusog ug kalig-on human ilang gipukan ang mas batan-ong F. Llamas Youth Association (FYA) Selection, 75-64 aron pabiling walay pilde sulod sa unom ka duwa ug maoy solo leader sa 2nd season sa Cebu International Port Users (CIPU) basketball tournament didto sa barangay Cogon-Ramos gym, ning dakbayan.
Sa sayo pa, nakaginhawa og lawom ang team owner sa Canillas Customs Brokerage (Yoryoj) nga si Roy Canillas human sila modaug batok sa Avenido Customs Brokers, 82-80 nga nasamok sa makadiyot dihang nag-away silang John Yap sa CCB ug Yulo Arevalo sa ACB sa tunga-tungang bahin sa fourth period. Mag-miting ang mga opisyales sa CIPU nga gilangkuban nilang Yoli Cena, Jef Garcia, Edwin Carmen ug Noel Medalle karong adlawa aron tukion kung unsay angay nga silot ang ipahamtang sa nalambigit og sukmagay.
Sa laing duwa, gilubong sa Mac Nels Forwarders nga gipangulohan ni Loreto Castillo ang Gonzales Brokers, 100-70.
Pilde unta sa duwa ang CCB apan wala ma-rehistro ang tres puntos nga additional tungod kay kuwang og players ang ACB ug matag player adunay three-point deduction.
Malipayon si Canillas sa ila karong 2-3 nga baraha diin tabla sila sa ACB ug duna na sila'y tsansa nga moabante sa sunod nga round diin duha lang ang matagak sa walo ka teams ug ang unom moabante. "Pirme gyud maayo ang among duwa basta motunga si Kern (Sesante) kay duna man goy maka-deliver apan pirme sab nuon kulba ang resulta," matod pa ni Canillas.
Sa opening day sa miaging buwan, midaog sab ang Canillas ug dos puntos batok sa Gonzales Brokers pinaagi sa winning lay-up ni Sesante.
Si Rex Bensi maoy nangu sa CCB sa iyang 20 puntos ug laing upat ka players ang mibahug og double figures.
Ang 6-0 nga Petracorta may tulo sab ka players ang mibahug og double figures lakip sa ilang beteranong sentro nga si Takloy Moral sa iyang 13 puntos.
Ang managsoong Medalle-Baeng ug Noel maoy nangu sa FYA sa ilang 23 ug 12 puntos, matag usa. (BANAT PALARO)