CEBU, Philippines - Misaad ang Sugbuanong fighter nga si Renan 'Limbas' Noblefranca nga iyang ibuga ang tanan niyang kusog sa pagdepensa niya sa iyang Yaw-Yan Fighting Challenge Championship (YFCC) junior lightweight title batok ni Arnel 'Ronin X' Ylanan sa Team Project X sa main event sa "Bakbakan sa San Remigio" kickboxing fight card sa Mayo 15 didto sa Artemio Masbate Sports Complex sa San Remigio.
"Tinud-anay lang, kuwang gyud ko sa ensayo pero ako gyud paningkamoton nga dili niya (Ylanan) mailog akong bakus," matud pa sa 22-anyos nga si Noblefranca atol sa press conference sa miaging gabii didto sa Yaw-Yan ArDigma headquarters.
Kini ang labing unang title defense ni Noblefranca sa iyang bakus nga nakuha niya human midaog pinaagi sa "unanimous decision" nga kadaugan batok ni Steve Sevilleno sa Mindanao sa miaging tuig diha sa Cebu Coliseum.
Sa iyang bahin, ang mas daku ug taas nga si Ylanan laraw nga moilog sa bakus aron usab mapakita ang iyang abilidad sa kickboxing.
"Mao ni akong unang away alang sa bakus ug naglaum ko makahimo'g impresyon. Dili ni MMA championship pero daku og matabang ang daog sa akong MMA career," matud ni Ylanan, kinsa bag-o lang nidaog pinaagi sa "split decision" batok ni Johnjier Torbiso sa Universal Reality Combat Championship (URCC)-Cebu niadtong Enero.
Sa supporting main event sa maong fight card nga gipasiugdahan ni Yaw-Yan ArDigma Cebu pinaagi sa ilang Founder/CEO ug VisMin Director Benigno 'Master Ekin' R. Caniga Jr. uban sa municipal government sa San Remigio nga gipangulohan ni Mayor Jay Olivar ug International Pharmaceuticals Inc. (IPI), ang walay pildeng si Jordan 'Labuyo' Balcita sa Yaw-Yan ArDigma-Fervilleon makigharong sa beteranong si Johnjier 'Durex Danger' Torbiso sa Durex Dragon
Kickboxing Club. Magsangka sab sila si Ronilo Espra sa Arcomjukai Kickboxing Club sa Mandaue ug Junrey Soquite sa Durex Dragon.