CEBU, Philippines - Miiskor na sab og dakung kadaugan ang San Marino Tuna/CIT-U Wildcats batok sa dinaog-daog nga
Raphael's Café/USJ-R Jaguars, 89-67 sa second round sa elimination sa Enervon CESAFI Partner's Cup 2013 basketball
tournament kagahapon didto sa Cebu Coliseum.
Mipakita dayon sa ilang kaagresibo ang San Marino Tuna gikan pagsugod hangtod sa ikaupat nga kuwarter,
hinuon mibahar ang ilang iskor sa third period diin igo lang sila milabaw og nuybe puntos, 61-52.
Ang Raphael's Café maoy nanginit sa ikatulong kuwarter uban sa ilang pointguard nga si Wilkins Sanchez nga
mitusak og unom ka sunod-sunod nga puntos, apan si Rex Villarosa maoy nakapasikit sa duwa diin mipatuasik siya og
pito ka sunod-sunod nga puntos lakip ang triple, 50-53 sa nahabiling 2:31 sa duwa.
Dali hinuon nga nakarekober ang San Marino sa final period dihang nibalik og duwa ang ilang mga alas aron
inaton ang labaw ngadto sa 20 puntos sa nanghinapos nga bahin sa duwa.
Gipangulohan ni Allan Dimco ang kadaugan pinaagi sa iyang 15 puntos, gisundan ni Vincent Menguito nga
adunay 14 puntos.
Sa laing bahin, mabakante ang Cebu Coliseum ugma gumikan kay ang Partner's Cup dad-on ngadto sa San
Remigio, Cebu diin ang walay pildeng Prime Asia Lending/UV Lancers laraw mokulit sa ilang ikasiyam nga daog batok sa
Cebu Landmasters/USC Warriors. (BANAT NEWS)