CEBU, Philippines - Dumaguete City - Nakab-ot sa Central Visayas ang ilang tinguha nga motugpa sa ikatulong dapit sa 2013 Palarong
Pambansa nga natapos kagahapon didto sa Gov. Mariano Perdices Memorial Stadium.
Ang host team mitapos sa usa ka semana nga national sporting events bitbit ang 333 puntos uban sa ilang 29 ka
gold, 46 ka silver ug 39 ka bronze medals. Ang secondary team adunay 186 puntos, samtang ang elementary mihipos og
151 puntos.
Maisip kini nga dakung kalampusan alang sa Central Visayas tungod kay pirme lang sila mapunta sa dapit sa
kapin na sa lima ka tuig.
Sama sa gihapon, ang National Capital Region (NCR) maoy naghari uban ang 596.5 points, gisundan sa
Western Visayas nga adunay 446.34 points. Ang Northern Mindanao maoy ikaupat sa ilang 288 points, samtang ang third
placer sa miaging tuig nga CALABARZON natagak ngadto sa ikalima sa ilang 250 points.
Ang secondary boys basketball ug elementary badminton team maoy katapusang mitampo og bulawan alang sa
Central Visayas.
Ang Sacred Heart School-Ateneo de Cebu (SHS-AdC) Magis Eagles nga mirepresentar sa Region VII
mihimo'g upset nga kadaugan batok sa San Sebastian-NCR, 70-66, kagahapon didto sa Lamberto Macias Sports and
Cultural Center.
Ang bigman nga si Dawn Hinrich Ochea ug Jair Igna maoy mibaswat sa Central Visayas human sila
magkumboya og 29 puntos.
Sa laing bahin, ang tandem nila ni Eloise Marie Camillo ug Catherina Garing mikabkab og bulawan sa
badminton doubles event, samtang si Camillo uban ni James Ryan Navaraette naka-gold sab sa badminton mixed doubles.
Sa football, ang Central Visayas misakiyo sa silver medal human mapilde ngadto sa Region IV-B sa finals
pinaagi sa penalty shootout, 4-5, samtang ang elementary ug girls secondary volleyball teams mihakot usab og silver
medals.
Katapusang mitunol og bronze medal sa Central Visayas mao si Cha Yuan Labiste sa taekwondo sa Kyorugi
category. (BANAT NEWS)