CEBU, Philippines - Pormal na nga buksan ang Palarong Pambansa karong adlawa didto sa Gov. Mariano Perdices Memorial Stadium.
Gipaabot nga maghugop ang kapin 12,000 ka atleta, coaches, delegation officials ug ilang pamilya sa opening ceremony ning tinuig nga sports competition.
Ipaila karon nga edisyon ang "wushu" alang sa secondary boys ug girls, "billiards" alang sa secondary boys ug "futsal" alang sa elementary girls isip demonstration sports isip kabahin sa tinguha sa Departamento sa Edukasyon pagdiskubre og mga talento gikan sa mga lagyong lugar.
Usa ka engranding parada gikan sa Silliman University campus paingon sa main stadium sa tanang 17 ka partisipanteng rehiyon ang pagahimuon ning usa ka semana nga kalihukan uban ni DepEd Secretary Bro. Armin Luistro, FSC nga maoy modeklarar sa pormal nga pagbukas sa duwa.
Gawas ni Luistro gipaabot sab motambong sa opening ceremony si Tonisito Umali sa DepEd, Negros Oriental Gov. Roel Degamo ug Dumaguete Mayor Manuel Sagarbarrio. (BANAT NEWS)